Read ბიბლია იობ. 4 Bible Online

იობ. 4 - ბიბლია bible

იობ. 4

¹და მიუგო ელიფაზ თემანელმა და თქვა:

²„სიტყვა რომ შემოგბედოთ, ხომ არ გაბეზრდები? მაგრამ ვის ძალუძს ლაპარაკისაგან თავი შეიკავოს?

³აი, შენ ბევრს არიგებდი ჭკუას, და დაუძლურებულ მკლავებს განამტკიცებდი;

⁴წაბორძიკებულს ფეხზე აყენებდა შენი სიტყვა, და ძალაგამოცლილ მუხლებს შენ ამაგრებდი.

⁵და ახლა შენც მოგადგა და გაბეზრდი, შენც გეწია და შეძრწუნდი,

⁶შენი მოშიშება ხომ შენი სასოებაა, და შენი გზების სიალალე — შენი იმედი?

⁷გაიხსენე, ვინმე თუ დაღუპულა უდანაშაულო? სადმე თუ ამომწყდარან მართალნი?

⁸როგორც მინახავს: სიავის მხვნელნი და შფოთის მთესველნი მასვე იმკიან.

⁹ღვთის სუნთქვაზე დაიღუპებიან და

¹⁰ღრიალი ლომისა და ხმა ძუ ლომისა, და ლომის ბოკვერთა კბილნი იმუსრებიან.

¹¹ლომი იღუპება უნადავლოდ, და ძუ ლომის ბოკვერნი იფანტებიან.

¹²სიტყვა მომეპარა, და ჩურჩული ჩამესმა ყურში;

¹³ღამეულ ხილვათა ფიქრებში გართული, როცა კაცთ ძილქუში ეცემათ,

¹⁴შიშმა და ძრწოლამ შემიპყრო, და ყველა ძვალი ამიცახცახა.

¹⁵და სულმა სახეზე გადამიქროლა, ტანზე თმები ამებურძგლა.

¹⁶შედგა, მაგრამ ვერ გავარჩიე მისი სახე, ჩემს თვალწინ იყო ხატება; დუმილი და მერე ხმა მესმის:

¹⁷შეიძლება ადამიანი ღმერთზე მართალი იყოს? შეიძლება ადამიანი თავის შემოქმედზე წმიდა იყოს?

¹⁸აჰა, თავის მსახურებსაც კი არ ენდობა, და თავის ანგელოზებშიც კი პოულობს ნაკლს!

¹⁹რაღა ითქმის თიხის სახლებში მცხოვრებლებზე, მტვერზე რომ უდგათ საფუძველი, მღილივით რომ იხოცებიან,

²⁰განთიადიდან საღამომდე რომ იმუსრებიან, შეუმჩნევლად იღუპებიან?

²¹აჰა, გაწყვეტილია მათი კარვის საბელი მათ შორის, სიბრძნის გარეშე კვდებიან ისინი.“