Read ბიბლია იობ. 40 Bible Online

იობ. 40 - ბიბლია bible

იობ. 40

¹და მიუგო უფალმა იობს და თქვა:

²„ნუთუ შეედავება შარიანი ყოვლადძლიერს? ღვთის მამხილებელმა გასცეს პასუხი!“

³მიუგო იობმა უფალს და უთხრა:

⁴„აჰა, მე არარაობა ვარ, რა გიპასუხო? პირზე ხელს ვიდებ.

⁵ერთხელ ვთქვი მე და აღარ მივუგებ მეორედაც, და აღარას დავძენ.“

⁶და მიუგო უფალმა იობს გრიგალიდან და უთხრა:

⁷„მამაკაცურად შემოისარტყლე წელი, შეგეკითხები და გამაგებინე.

⁸ნუთუ გააუქმებ ჩემს სამართალს, მე გამამტყუნებ, რათა თავად გამართლდე?

⁹და ნუთუ ღვთისდარი მკლავი გაქვს, და მისგვარი ხმით შეგიძლია ჭექა?

¹⁰აბა, მოიკაზმე დიდებითა და სიდიადით, შარავანდი და ბრწყინვალება შეიმოსე.

¹¹გადმოაფრქვიე მძვინვარება შენი რისხვისა, და დახედე ქედმაღალს და დაამდაბლე.

¹²დახედე ყოველ ქედმაღალს და დაამცირე და მათ ადგილზევე გათელე უკეთურნი.

¹³ჩამარხე მტვერში ერთიანად, მათი სახე დაფარულში მობურე.

¹⁴და მაშინ მეც ვაღიარებ, რომ გიხსნის შენი მარჯვენა.

¹⁵აჰა, ბეჰემოთი, შენთან ერთად რომ შევქმენი, ხარივითა ძოვს ბალახს.

¹⁶აჰა, მის წელშია მისი ძალა და მისი ღონე მისი მუცლის კუნთებში.

¹⁷ნაძვივითა დრეკს თავის კუდს, ბარძაყის ძარღვები გადაგრეხილი აქვს,

¹⁸მისი ძვლები სპილენძის მილებია. მისი სახსრები რკინის წნელებივითაა.

¹⁹ის პირველია ღვთის ქმნილებათაგან, მხოლოდ მის გამჩენს ძალუძს მისი მოკვლა.

²⁰რადგან მთები აძლევენ საზრდოს, და იქ შეიქცევს თავს ველის ყოველი ცხოველი.

²¹ლოტოსებქვეშ გაწოლილა, ლერწმისა და ჭაობის საფარში.

²²ლოტოსები ჩრდილს აფენენ მას, გარს ძეწნები ახვევია.

²³აჰა, წყალს სვამს მდინარისას და არ ჩქარობს, არ კრთება, მშვიდადაა, მის პირს იორდანეც რომ მიასკდეს.

²⁴თვალით ვინ შეიპყრობს მას? ვინ გაუხვრეტს ცხვირს ჩანგლებით?“