Read ბიბლია იობ. 41 Bible Online

იობ. 41 - ბიბლია bible

იობ. 41

¹„თუ ამოათრევ ლევიათანს ანკესით და საბლით თუ დაუბამ ენას?

²ლერწამს თუ გაუყრი მას ცხვირში და კაუჭით თუ გაუხვრეტ ყბას?

³თუ განამრავლებს ის შენს მიმართ ვედრებას და ტკბილად თუ დაგელაპარაკება?

⁴თუ დაგიდებს აღთქმას, და საუკუნო მონად თუ გაიხდი?

⁵თუ ეთამაშები მას, როგორც ჩიტს და თუ დაუბამ მას შენს გოგონებს?

⁶თუ ივაჭრებენ მასზე მოვაჭრენი თუ გაყოფენ მას ვაჭართა შორის?

⁷თუ აუვსებ მას კანს ისრებით და თავს — ბარჯებით?

⁸დაადე მას შენი ხელი, გახსოვდეს ბრძოლა და აღარ შეეცდები!

⁹აჰა, გაცრუვდა შენი იმედი; მის შეხედვაზეც კი დაეცემი.

¹⁰რომელი მამაცი გააღვიძებს მას? ვინ არის, რომ წინ დამიდგეს?

¹¹ვინ გამომიწვია მე, რომ გადავუხადო? მთელი ცისქვეშეთი ჩემია.

¹²არ დავდუმდები მისი სხეულის კიდურებზე, მის ძლიერებაზე, მის მოხდენილ აღნაგობაზე.

¹³ვინ მოხდის მას მოსასხამს? ვინ შეაღწევს მის ორკეც აბჯარში?

¹⁴მისი პირისახის კარს ვინ გააღებს? მის კბილთა ირგვლივ საშინელებაა!

¹⁵მისი ზურგი ფარების წყებაა, მჭიდრო ბეჭდით შეკრული.

¹⁶ერთი მეორეზეა და ქარი ვერ ატანს მათ შორის:

¹⁷ერთმანეთზე არიან მიწებებულნი, შეიკვრნენ და ვეღარ დაშორდებიან.

¹⁸მისი ცხვირის ცემინება ნათელს აკვესებს და მისი თვალები ცისკრის წამწამებივითაა.

¹⁹მისი სახიდან ჩირაღდნები გამოდის და ცეცხლის ნაპერწკალები ცვივა.

²⁰მისი ნესტოებიდან კვამლი გამოდის, როგორც ათუხთუხებული ქვაბიდან და ცეცხლმოკიდებული ლერწმიდან.

²¹მისი სუნთქვა ნაკვერცხლებს აღვივებს, და მისი პირიდან ალი გამოდის.

²²მის ქედზე ძალა ათენებს, და მის წინაშე ცეკვავს ძრწოლა.

²³მისი ხორცის ნაწილები შეწებებულია ერთმანეთს, მტკიცედ ასხია მას, უძვრელად.

²⁴მისი გული ქვასავით მტკიცე. და ქვედა დოლაბივით მაგარია.

²⁵მის წამომართვაზე ძრწიან ღმერთები.

²⁶სწვდება მას მახვილი, მაგრამ ვერას აკლებს, ასევე ვერც შუბი, ლახვარი და ჰოროლი.

²⁷რკინა ჩალად უჩანს, სპილენძი ფუტურო ხედ.

²⁸ვერ გააქცევს მას ისარი, თივად არის ქცეული მისთვის შურდულის ქვები.

²⁹ბზედ უჩანს მას ლახტი და დასცინის ჰოროლის ზუზუნს.

³⁰ქვემოდან მას წამახული კეცის ნატეხები აქვს, კევრივით არის გაწოლილი საფლობში,

³¹ქვაბივით ადუღებს უფსკრულს, ზღვას საცხებლის ქვად აქცევს.

³²თავის უკან ბილიკს ანათებს, უფსკრული ჭაღარად ჩანს.

³³არ არის მიწაზე მისი მსგავსი, უშიშრად გაჩენილი.

³⁴ყოველივე მაღალს ხედავს: ის მეფობს ყოველ ქედმაღალზე.“