Read ბიბლია იობ. 6 Bible Online

იობ. 6 - ბიბლია bible

იობ. 6

¹და მიუგო იობმა და თქვა:

²„წონით რომ აწონილიყო ჩემი ტანჯვა, და ჩემი უბედურება სასწორზე დადებულიყო,

³მაშინ იგი ზღვის ქვიშაზე უფრო მძიმე იქნებოდა, ამიტომაც არის, რომ წინდაუხედავია ჩემი სიტყვები.

⁴რადგან ყოვლადძლიერის ისრები მე განმეწონენ და მათ შხამსა სვამს ჩემი სული, ღვთის საშინელებანი ამიმხედრდნენ.

⁵ყროყინებს გარეული ვირი, თუ ბალახი აქვს? ბღავის ხარი, თუ ბაგა მაღლა აქვს?

⁶თუ იჭმება უგემური რამ მარილის გარეშე? და თუ აქვს გემო კვერცხის ცილას?

⁷გული არ მიმდის მათზე, ასეთია ჩემი დღიური ლუკმა.

⁸ნეტა ახდებოდეს ჩემი ნატვრა, და იმედს გამიმართლებდეს ღმერთი!

⁹ნეტა, ინებებდეს ღმერთი და დამლეწდეს! გამოიწვდიდეს ხელს და გამკვეთდეს!

¹⁰და ეს იქნებოდა კიდევ ჩემი ნუგეში, და ულმობელი სატკივრით გავიხარებდი, რადგან არ უარმიყვია წმიდის სიტყვები.

¹¹რადგან რაა ჩემი ძალა, რომ დავენდო? რაა ჩემი ბოლო, რომ დავითმინო?

¹²განა ქვის სიმტკიცეა ჩემი სიმტკიცე? განა სპილენძისაა ხორცი ჩემი?

¹³განა აღარ არის ჩემი შეწევნა ჩემში? განა განმეშორა დავლათი?

¹⁴გატანჯულს თავისი მოყვასისაგან აქვს წყალობა, თუნდაც დაივიწყოს ყოვლადძლიერის შიში.

¹⁵ჩემი ძმები მაცდურობენ, როგორც ნიაღვარი, როგორც კალაპოტი იმ ნიაღვრებისა, უკვალოდ რომ უჩინარდებიან,

¹⁶ყინულისაგან რომ ამღვრეულან და თოვლი რომ ჩამდნარა მასში.

¹⁷როგორც კი მზე დააჭერს, მაშინვე რომ ქრებიან, დააცხუნებს და ადგილზევე უჩინარდებიან.

¹⁸ქარავნები გეზს იცვლიან, გადიან უდაბნოში და იკარგებიან.

¹⁹გასცქეროდნენ თემას ქარავნები, მათი იმედი ჰქონდათ შებას მოგზაურებს.

²⁰გაწბილდნენ, რადგან იმედი ჰქონდათ, მივიდნენ იქ და შერცხვნენ.

²¹და ახლა თქვენ არარაობა ხართ, იხილეთ საშინელება და შეგეშინდათ.

²²გითხარით განა: რამე მომიტანეთ-მეთქი? ან თქვენი დოვლათიდან ქრთამი გაეცით-მეთქი ჩემთვის?

²³ან დამიხსენით-მეთქი მტრის ხელიდან? ან მტარვალთა ხელიდან გამომისყიდეთ-მეთქი?

²⁴მასწავლეთ და დავდუმდები, და რა შემეშალა, გამაგებინეთ.

²⁵რა ძლიერია წრფელი სიტყვა, და რას მსაყვედურობს თქვენი საყვედური?

²⁶ნუთუ ფიქრობთ, საყვედური გამოთქვათ ჩემს სიტყვებზე? და სასოწარკვეთილი კაცის იმ ნათქვამზე, ქარს რომ ეკუთვნის?

²⁷ობოლზეც კი წილს იყრით და ძირს უთხრით თქვენს მეგობარს.

²⁸ახლა ინებეთ და მომხედეთ, და ნახეთ, თუ ვიცრუე თქვენს წინაშე.

²⁹მობრუნდით, გევედრებით, და ნუ იქნება უსამართლობა. მობრუნდით, ჩემი სიმართლე კვლავაც აქ არის!

³⁰აბა, თუ არის ჩემს ენაზე უსამართლობა? თუ ვერ ხვდება ჩემი სასა უბედურებას?“