Read ბიბლია ფსალმ. 107 Bible Online

ფსალმ. 107 - ბიბლია bible

ფსალმ. 107

¹გალობა. ფსალმუნი. დავითისა.

²მზად არის ჩემი გული, ღმერთო, მსურს გაქო და გიგალობო; გამოიღვიძე, სულო ჩემო!

³გამომაღვიძე, ჩანგო და ქნარო! გამოვაღვიძებ ცისკარს.

⁴გადიდებ შენ, უფალო, ერებს შორის და გიგალობებ მოდგმათა შორის,

⁵რადგან დიდია ზეცაზე მეტად წყალობა შენი, და ღრუბლებამდეა ჭეშმარიტება შენი.

⁶ამაღლდი ცათა ზემოთ, ღმერთო, და მთელ ქვეყნიერებას გასწვდეს დიდება შენი,

⁷რათა გადარჩნენ საყვარელნი შენნი; მიხსენი შენი მარჯვენით და მიპასუხე!

⁸ღმერთმა თქვა თავის საწმიდარში: „ვიზეიმებ! გავანაწილებ შექემს და სუქოთის დაბლობს გავზომავ.

⁹ჩემია გილყადი, ჩემია მენაშე, და ეფრემი ჩაჩქანია ჩემი თავისა, იუდა — კვერთხი ჩემი.

¹⁰მოაბი ავზია ჩემი განსაბანელი, ედომს მისწვდებიან ხამლნი ჩემნი, ფილისტიმს დავკივლებ.“

¹¹ვინ შემიყვანს გამაგრებულ ქალაქში? ვინ წამიძღვება ედომისაკენ?

¹²ნუთუ შენ არა, ღმერთო, რომელმაც მიგვატოვე და აღარ გამოხველ ჩვენს მხედრობასთან?

¹³მოგვეც შეწევნა გაჭირვებაში, რადგან ამაოა შველა კაცისმიერი.

¹⁴ღმერთით შევქმნით ლაშქარს და ის დათრგუნავს ჩვენს მტრებს.