Read ბიბლია ფსალმ. 113 Bible Online

ფსალმ. 113 - ბიბლია bible

ფსალმ. 113

¹როდესაც გამოვიდა ისრაელი ეგვიპტიდან, სახლი იაკობისა — უცხოენოვანი ერისაგან,

²გახდა იუდა მისი საწმიდარი, ისრაელი — მისი სამფლობელო.

³ზღვამ დაინახა და ილტოდა, იორდანე უკან გაბრუნდა;

⁴მთები აცეკვდნენ ერკემლებივით, ბორცვნი — კრავებივით.

⁵რა დაგემართა, ზღვაო, რომ ილტოდი, და, იორდანევ, უკან რომ გაბრუნდი?

⁶მთებო, რას ცეკვავთ ერკემლებივით და, ბორცვებო, კრავებივით?

⁷უფლის წინაშე ძრწოდე, დედამიწავ, იაკობის ღმრეთის წინაშე,

⁸რომელმაც გადააქცია კლდე წყალსატევად, კაჟი — წყაროს წყლად!

⁹ჩვენ არა, უფალო, ჩვენ არა, არამედ შენს სახელს მიაგე დიდება, შენი წყალობით, შენი ჭეშმარიტებით.

¹⁰რატომ უნდა თქვან წარმართებმა: „სად არის ღმერთი მათი?“

¹¹ხოლო ჩვენი ღმერთი ზეცაშია; ყოველივე, რაც სურდა, მოიმოქმედა.

¹²მათი კერპები ვერცხლი და ოქროა, ადამიანთა ხელით შექმნილი.

¹³პირი აქვთ და ვერ ლაპარაკობენ, თვალები აქვთ და ვერ ხედავენ,

¹⁴ყურები აქვთ და არ ესმით, ცხვირი აქვთ და ვერ იყნოსავენ,

¹⁵ხელები აქვთ და ვერაფერს ეხებიან, ფეხები აქვთ და ვერ დადიან, ხმას ვერ გამოსცემენ თავიანთი ხორხიდან.

¹⁶მათ დაემსგავსებიან მათი გამკეთებლები, ყველა, ვინც მათზეა მინდობილი.

¹⁷ისრაელო, მიენდე უფალს! შემწე და ფარია ის მათი.

¹⁸აარონის სახლო, მიენდე უფალს! შემწე და ფარია ის მათი.

¹⁹მოშიშნო უფლისა, მინდეთ უფალს! შემწე და ფარია ის მათი.

²⁰უფალს ვახსოვართ — გვაკურთხებს! აკურთხებს ისრაელის სახლს, აკურთხებს აარონის სახლს!

²¹აკურთხებს უფლის მოშიშებს, პატარებს დიდებთან ერთად.

²²დაე, გაგამრავლოთ უფალმა თქვენ, თქვენ და თქვენი შვილები.

²³კურთხეული ხართ უფლის მიერ, ცისა და ქვეყნის შემოქმედის მიერ.

²⁴ცა — ცად უფლისათვის, ხოლო ქვეყანა მისცა კაცთა შვილებს.

²⁵არა თუ მკვდრები აქებენ უფალს და ან ყოველი შავეთს შთასული,

²⁶არამედ ჩვენ ვადიდებთ უფალს ამიერიდან უკუნისამდე. ალელუია!