ბიბლია bible online

ფსალმ. 118

¹ნეტარ არიან უბიწონი გზაზე, რომელნიც დადიან უფლის რჯულზე.

²ნეტარ არიან მის მცნებათა დამცველნი, მთელი გულით რომ ეძებენ მას.

³არც სიავკაცე ჩაუდენიათ, მისი გზით დადიან!

⁴შენ ამცნე შენს ბრძანებათა დაცვა რათა ზედმიწევნით დაიცვან.

⁵ნეტამც წარიმართოს ჩემი გზები შენი წესდების დასაცავად!

⁶მაშინ აღარ შემრცხვებოდა, როს შევხედავდი შენს ყოველ მცნებას.

⁷განგადიდებდი გულის სიწრფელით, როს მასწავლიდი სამართალს შენი სიმართლისა.

⁸შენს წესებს დავიცავ; ნუ მიმატოვებ საბოლოოდ!

⁹რით შეინახოს ყმაწვილმა სიწმინდე თავისი გზისა? დაიცვას შენი სიტყვისამებრ!

¹⁰მთელი გულით გეძიებ შენ; ნუ გადამახვევინებ შენთა მცნებათაგან!

¹¹გულში ჩავიმარხე შენი სიტყვები, რათა არ შეგცოდო.

¹²კურთხეულ ხარ შენ, უფალო! მასწავლე წესები შენი.

¹³ჩემი ბაგეებით მოვუთხრობდი ყველა სამართალს შენი პირისას.

¹⁴შენთა მცნებათა გზაზე ვხარობდი, ვითარცა მთელ სიმდიდრეზე.

¹⁵შენს მცნებებზე ვიფიქრებ და დავუკვირდები შენს გზებს.

¹⁶შენი წესებით გავიხარებ, არ დავივიწყებ შენს სიტყვებს.

¹⁷კეთილი უყავ შენს მორჩილს, რათა და დავიცვა შენი სიტყვა.

¹⁸აღმიხილე თვალნი და ვჭვრეტდე საოცრებებს შენი რჯულისას!

¹⁹მწირი ვარ ქვეყანაზე, ნუ დამიმალავ შენს მცნებებს!

²⁰მოითენთა სული ჩემი წადილით შენი სამართლისა ყოველჟამს.

²¹შერისხე ამპარტავანნი, წყეულნი,

²²ამაცილე სირცხვილი და შეურაცხყოფა, რადგან შენს მცნებებს ვიცავდი!

²³დასხდებიან კიდეც მთავარნი, შენი მორჩილი კი ისაუბრებს შენს წესებზე.

²⁴შენი მცნებებიც სიხარულია ჩემთვის; მრჩეველნი ჩემნი.

²⁵მიწა-მტვერს მიეკრა სული ჩემი; მაცოცხლე შენი სიტყვისამებრ.

²⁶გზანი ჩემნი განგიცხადე და მიპასუხე; მასწავლე წესები შენი.

²⁷გზა შენთა ბრძანებათა გამაგებინე და ვილაპარაკებ შენს საოცრებებზე.

²⁸ნაღველმა დაადნო სული ჩემი, გამამაგრე შენი სიტყვისამებრ!

²⁹გზა სიცრუისა განმაშორე და შენი რჯულით შემიწყალე!

³⁰გზა ჭეშმარიტებისა ამოვირჩიე, შენი სამართალნი წინ დავიყენე.

³¹მივეკარ შენს მცნებებს, უფალო, ნუ გამაწბილებ.

³²შენთა მცნებათა გზით ვრონინებდე, რადგან განავრცობ ჩემს გულს.

³³მიჩვენე, უფალო, გზა შენთა წესთა, და დავიცავ ბოლომდე.

³⁴გამაგებინე და დავიცავ შენს რჯულს და შევინახავ მთელი გულით.

³⁵დამაყენე შენთა მცნებათა კვალზე, რადგანაც მწადია იგი.

³⁶მიდრიკე ჩემი გული შენს მოწმობათაკენ და არა ანგარებისაკენ

³⁷მოარიდე თვალი ჩემი ამაოების ცქერას; შენი გზით მაცოცხლე!

³⁸დაუმტკიცე შენს მონას შენი ნათქვამი შენგან მოშიშების გამო.

³⁹ამაცილე შერცხვენა, რომლისაც მეშინია, რადგან შენნი სამართალნი კეთილია!

⁴⁰აჰა, ვისურვე ფრიად შენი ბრძანებანი; შენი სიმართლით მაცოცხლე მე!

⁴¹მოვიდნენ ჩემზე წყალობანი შენნი, უფალო, ხსნა შენმიერი, შენი სიტყვისამებრ!

⁴²და პასუხს გავცემ ჩემს მაგინებელს; რადგან ვიმედოვნებ შენი სიტყვით.

⁴³ნუ წაართმევ ჩემს ბაგეთ ჭეშმარიტების რადგან შენს სამართალს მოველი!

⁴⁴დავიცავ შენს რჯულს მარადის, უკუნითი უკუნისამდე.

⁴⁵ვივლი ხალვათად, რადგან შენს ბრძანებებს ვეძიებდი.

⁴⁶ვილაპარაკებ შენს მოწმობებზე მეფეთა წინაშე და არ შემრცხვება.

⁴⁷გავიხარებ შენი მცნებებით, რომლებიც მიყვარს;

⁴⁸ხელთ აღვაპყრობ შენთა მცნებათა მიმართ, რომლებიც მიყვარს, და ვისაუბრებ შენს წესებზე.

⁴⁹გაუხსენე შენს მორჩილს სიტყვა, რომლითაც დამაიმედე მე!

⁵⁰ეს არის ჩემი ნუგეში გაჭირვებაში, რადგან შენმა ნათქვამმა გამაცოცხლა.

⁵¹ამპარტავანნი დამცინოდნენ მეტისმეტად; შენი რჯულიდან არ გადამიხვევია.

⁵²ვიხსენიებდი შენს სამართალს, უფალო, რომელიც უკუნისიდან არის ადრიდანვე, და დარდს ვიქარვებდი.

⁵³თავზარი მეცემოდა ურჯულოთა გამო, რომლებიც ტოვებდნენ შენს რჯულს.

⁵⁴სიმღერებად იქცა ჩემთვის შენი წესები ჩემს საცხოვრებელ სახლში.

⁵⁵ვიხსენებდი ღამით შენს სახელს, უფალო, და ვიცავდი შენს რჯულს.

⁵⁶ეს იყოს ჩემთვის, რადგან შენს ბრძანებას ვიცავდი.

⁵⁷ჩემი ხვედრია, ვთქვი, უფალო, შენთა სიტყვათა დაცვა!

⁵⁸გევედრებოდი მთელი გულით; შემიწყალე შენი სიტყვისამებრ.

⁵⁹ვფიქრობდი ჩემს გზებზე და ვიბრუნებდი ფეხს შენი მცნებებისაკენ.

⁶⁰ვჩქარობდი და არ ვაყოვნებდი შენთა მცნებათა დაცვას.

⁶¹საბელებივით გარს შემომერტყნენ ბოროტეულნი, შენი რჯული არ დავივიწყე.

⁶²შუაღამისას ვდგები შენს სადიდებლად, შენი მართალი განსჯების გამო.

⁶³თანაზიარი ვარ ყოველთა მოშიშთა შენთა, და ვინც იცავენ შენს მცნებებს.

⁶⁴შენი წყალობით, უფალო, სავსეა ქვეყნიერება;

⁶⁵კეთილი ქმენ შენი მორჩილისათვის, უფალო, შენი სიტყვისამებრ.

⁶⁶კეთილი აზრი და გაგება მასწავლე, რადგან ვირწმუნე შენი მცნებანი.

⁶⁷ვიდრე დავიტანჯებოდი, შევცდი; ახლა კი შენს სიტყვას ვიცავ.

⁶⁸კეთილი ხარ და კეთილსა იქმ, მასწავლე წესები შენი.

⁶⁹ტყუილს ჩმახავენ ამპარტავანნი ჩემზე, მე მთელი გულით დავიცავ შენს ბრძანებებს.

⁷⁰დამსუყდა ცხიმივით მათი გული, მე შენი რჯულით ვხარობდი.

⁷¹კარგია ჩემთვის, რომ ვეწამე, ვინძლო ვისწავლო წესდებანი შენი.

⁷²უმჯობესია ჩემთვის რჯული შენი ბაგისა, ვიდრე ათასი ოქრო და ვერცხლი.

⁷³შენმა ხელებმა შემქმნეს და წარმმართეს; შთამაგონე და ვისწავლი შენს მცნებებს.

⁷⁴მოშიშნი შენნი შემხედავენ და გაიხარებენ, რადგან შენს სიტყვებზე ვარ მინდობილი.

⁷⁵ვიცოდი, უფალო, რომ მართალია შენი სამართალი, და სამართლიანად შემაჭირვე.

⁷⁶დაე, იყოს შენი წყალობა ჩემს სანუგეშოდ, როგორც აღუთქვი შენს მორჩილს!

⁷⁷მოვიდეს ჩემდამი წყალობა შენი და ვიცოცხლებ! რადგან შენი რჯული სიხარულია ჩემი.

⁷⁸შერცხვეთ ამპარტავნებს, მე კი ვისაუბრებ შენს ბრძანებებზე.

⁷⁹დაბრუნდნენ ჩემთან მოშიშნი შენნი და მცოდნენი შენი მცნებებისა.

⁸⁰იყოს ჩემი გული უბიწო შენს სამართალში, რათა არ შევრცხვე.

⁸¹დადნა შენი შეწევნის მოლოდინში ჩემი სული. შენს სიტყვაზე ვარ დაიმედებული.

⁸²დადნენ თვალნი ჩემნი შენი სიტყვის მოლოდინში, ვამბობ: „როდის მანუგეშებ მე?“

⁸³ვიყავი, ვითარცა ტიკი ორთქლში, და მაინც შენი წესები არ დავივიწყე.

⁸⁴რაღამდენია დღენი შენი მორჩილისა? როდის გაასამართლებ ჩემს მდევნელებს?

⁸⁵გამითხარეს ამპარტავნებმა ორმო, მათ, ვინც არ მიჰყვებიან შენს რჯულს.

⁸⁶ყველა შენი მცნება ჭეშმარიტებაა; სიცრუვით მდევნიან, მიშველე.

⁸⁷ლამის გამანადგურეს მიწაზე; და მაინც არ მივატოვე შენი ბრძანებანი.

⁸⁸შენი წყალობით მაცოცხლე და დავიცავ მოწმობებს შენი პირისას.

⁸⁹უკუნისამდე, უფალო, შენი სიტყვა დაფუძნებულია ზეცაში.

⁹⁰თაობიდან თაობამდეა ჭეშმარიტება შენი! დაამყარე ქვეყანა და დგას.

⁹¹შენი მსჯავრით დგანან დღესაც, რადგან ყოველნი გმსახურებენ.

⁹²შენი რჯული რომ არ ყოფილიყო ჩემდა ნუგეშად, დავიღუპებოდი ჩემს ტანჯვაში.

⁹³უკუნისამდე არ დავივიწყებ ბრძანებებს შენსას, რადგან მათით მასულდგმულებდი.

⁹⁴შენი ვარ; მიხსენი, რადგან შენს ბრძანებებს ვეძიებდი!

⁹⁵მიდარაჯდებიან ბოროტნი, რომ დამღუპონ; შენს მცნებებს ღრმად ვუკვირდები.

⁹⁶ყოველნაირი სრულქმნილების მინახავს ბოლო; მაგრამ ვრცელია შენი მცნებანი ფრიად.

⁹⁷რარიგად მიყვარს რჯული შენი! ის არის ჩემი საფიქრალი დღენიადაგ.

⁹⁸ჩემს მტრებზე მეტად დამაბრძენე შენი მცნებით; რადგან მარადის ჩემთანაა იგი.

⁹⁹ყველა ჩემს მასწავლებელზე გონიერი გავხდი, რადგან შენი მცნებანი საფიქრალია ჩემი.

¹⁰⁰მოხუცებზე მეტად საზრიანი ვარ, რადგანაც შენს ბრძანებებს ვიცავ.

¹⁰¹ყოველგვარ ბოროტ გზას მოვარიდე ფეხი, რათა დავიცვა შენი სიტყვა.

¹⁰²შენთა განგებულებათაგან არ გადამიხვევია, რადგან შენ გამასწავლე.

¹⁰³რარიგ ატკბობს ჩემს სასას შენი სიტყვები, თაფლზე ტკბილია ჩემი პირისთვის!

¹⁰⁴შენი ბრძანებით საზრიანი გავხდი, ამიტომ მოვიძულე სიცრუის ყოველი გზა.

¹⁰⁵სანთელია ჩემი ფეხისთვის სიტყვა შენი და სინათლე — ჩემი ბილიკისათვის.

¹⁰⁶დავიფიცავ და ავასრულებ, შენს მართალ განსჯებს.

¹⁰⁷დავმდაბლდი ფრიად; უფალო, მაცოცხლე შენი სიტყვისამებრ!

¹⁰⁸ნებსითი მსხვერპლი ჩემი პირისა ისურვე, გთხოვ, უფალო, და სამართალნი შენნი მასწავლე.

¹⁰⁹სული ჩემი ჩემს ხელისგულზეა მუდამ, და შენს რჯულს არ ვივიწყებ.

¹¹⁰დამიგეს ბოროტებმა მახე, მაგრამ შენი ბრძანებებისთვის არ გადამიხვევია.

¹¹¹დავიმკვიდრე მოწმობანი შენნი საუკუნოდ, რადგან ისინი ჩემი გულის სიხარულია.

¹¹²მოვდრიკე გული ჩემი წესთა შენთა

¹¹³ბოროტგანმზრახველნი შევიძულე, და შენი რჯული შევიყვარე.

¹¹⁴თავშესაფარი და ფარი ხარ ჩემი; შენს სიტყვაზე ვარ დაიმედებული.

¹¹⁵შორს ჩემგან, უკეთურნო, და მე დავიცავ მცნებებს ჩემი ღმერთისას!

¹¹⁶შემეწიე შენი სიტყვისამებრ და ვიცოცხლო, და ნუ გამიწბილებ ჩემს იმედს!

¹¹⁷განმამტკიცე და გადავრჩე, ასეა ჩემი შველა და ჩავწვდები შენს წესდებებს ყოველთვის.

¹¹⁸მოსრე ყოველი, ვინც განუდგა შენს წესებს, რადგან სიცრუეა მათი ხრიკები.

¹¹⁹როგორც ნაყარ-ნუყარი, მოსპე ყოველი ბოროტი ქვეყანაზე, ამიტომ შევიყვარე მცნებანი შენნი.

¹²⁰თრთის შენი შიშით სხეული ჩემი და მეშინია შენი განკითხვების.

¹²¹ვქმენ სამართალი და სიმართლე; ნუ შემატოვებ მჩაგვრელებს ჩემსას.

¹²²გამოესარჩლე შენს მორჩილს სასიკეთოდ, რომ არ დამჩაგრონ ამპარტავნებმა.

¹²³დადნენ თვალნი ჩემნი შენი შეწევნისა და შენი სიმართლის სიტყვის მოლოდინში.

¹²⁴მოიმოქმედე შენი მორჩილისთვის შენი წყალობისამებრ და წესდებანი შენი მასწავლე.

¹²⁵მორჩილი ვარ შენი; გონიერ-მყავ, რათა შევიმეცნო მოწმობანი შენნი.

¹²⁶ჟამია უფლის მოქმედებისა — მოშალეს რჯული შენი!

¹²⁷ამიტომ მიყვარს მცნებანი შენნი ოქროზე და ბაჯაღლოზე მეტად;

¹²⁸ამიტომ ყველა შენი ბრძანება მძულს ყოველი გზა სიცრუისა.

¹²⁹საოცარია მოწმობანი შენნი; ამიტომ ინახავს მათ სული ჩემი.

¹³⁰საწყისი შენი სიტყვებისა ანათებს, აგონიერებს მიამიტებს.

¹³¹პირი გავხსენი და ამოვისუნთქე, რადგან მომენატრა მცნებანი შენნი.

¹³²მომხედე და შემიწყალე, როგორც შეეფერებათ შენი სახელის მოყვარულთ.

¹³³ჩემი ნაბიჯები წარმართე შენი სიტყვისამებრ და ნუ გააბატონებ ჩემზე ნურა უსამართლოს.

¹³⁴გადამარჩინე ადამიანის ჩაგვრისაგან, ასე დავიცავ შენს ბრძანებებს.

¹³⁵შენი სახე მოაშუქე შენს მორჩილს და მასწავლე წესდებანი შენი.

¹³⁶ცრემლთა ნაკადები გადმომდის თვალთაგან, რადგან არ იცავენ შენს რჯულს.

¹³⁷მართალი ხარ შენ, უფალო, და სწორია გამგებულებანი შენი.

¹³⁸ამცნე სიმართლით მოწმობანი შენნი და ჭეშმარიტია მეტად.

¹³⁹დამღრღნა ეჭვმა, რადგან დაივიწყეს

¹⁴⁰ხალასია შენი ნათქვამი ფრიად და შენს მორჩილს უყვარს იგი.

¹⁴¹მცირე ვარ და მოძულებული; შენს ბრძანებებს არ ვივიწყებ.

¹⁴²სიმართლე შენი მარადიული სიმართლეა, და შენი რჯული ჭეშმარიტია.

¹⁴³განსაცდელი და გაჭირვება წამომეწია; მაგრამ შენი ბრძანებანი სიხარულია ჩემთვის.

¹⁴⁴სიმართლეა შენი მოწმობანი მარადის; შთამაგონე და ვიცოცხლებ!

¹⁴⁵მოგიხმობ მთელი გულით; შენს წესდებებს დავიცავ.

¹⁴⁶შენ მოგიხმობ, გადამარჩინე, და დავიცავ შენს მოწმობებს.

¹⁴⁷გარიჟრაჟამდე მოვალ და ვიღაღადებ, შენს სიტყვაზე ვარ დაიმედებული.

¹⁴⁸ჩემმა თვალებმა დაასწრეს ღამის ებგურს, რათა ვილაპარაკო შენს ნათქვამზე.

¹⁴⁹ჩემი ხმა ისმინე შენი წყალობისამებრ, უფალო, შენი სიმართლისამებრ მაცოცხლე.

¹⁵⁰ახლოს არიან ავისმზრახველნი; შენი რჯულისაგან კი შორს დგანან.

¹⁵¹ახლოს ხარ, უფალო, და ყოველი მცნება შენი ჭეშმარიტებაა.

¹⁵²ადრიდანვე შევიტყვე შენთა მოწმობათა შესახებ, რომ სამარადჟამოდ დააფუძნე ისინი.

¹⁵³შეხედე ჩემს სიგლახაკეს და გადამარჩინე, რადგან შენი რჯული არ დავივიწყე!

¹⁵⁴გამომესარჩლე და დამიხსენი, შენი სიტყვისამებრ მაცოცხლე.

¹⁵⁵შორს არის ბოროტთაგან შველა, რადგან შენს წესდებებს არ ეძიებენ.

¹⁵⁶მოწყალებანი შენნი უხვია, უფალო, შენი სამართლის მიხედვით მაცოცხლე.

¹⁵⁷ბევრია ჩემი მდევარი და მოდავე; შენი მოწმობებისათვის არ გადამიხვევია.

¹⁵⁸ვხედავ განდგომილთ და ზიზღი მიპყრობს, რადგან შენს სიტყვებს არ იცავენ.

¹⁵⁹ნახე, რარიგ შევიყვარე შენი ბრძანებანი; უფალო, შენი წყალობისამებრ მაცოცხლე.

¹⁶⁰დასაბამი შენი სიტყვისა ჭეშმარიტებაა, და საუკუნოა ყველა განგებულება შენი სამართლისა.

¹⁶¹მთავარნი მდევნიან უმიზეზოდ; და შენი სიტყვებისაგან დაშინებულია გული ჩემი.

¹⁶²ვხარობ შენს სიტყვაზე, ვითარცა მპოვნელი უხვი ნადავლისა.

¹⁶³სიცრუე მძულს და მძაგს; შენი რჯული მიყვარს.

¹⁶⁴დღეში შვიდგზის გაქებ შენი მართალი განსჯებისათვის.

¹⁶⁵დიდია მშვიდობა შენი რჯულის მოყვარულთა, და არ არსებობს მათთვის დაბრკოლება.

¹⁶⁶იმედი მქონდა შენი შეწევნისა, უფალო, და შენს ბრძანებებს ვასრულებდი.

¹⁶⁷იცავდა ჩემი სული შენს მოწმობებს და მე ისინი მიყვარს ძალიან.

¹⁶⁸ვიცავდი შენს ბრძანებებს და მოწმობებს. რადგან ყველა ჩემი გზა შენს წინაშეა.

¹⁶⁹მოახლოვდეს ჩემი ღაღადი შენს წინაშე, უფალო, და შენი სიტყვისამებრ განმსწავლე.

¹⁷⁰მოვიდეს ჩემი ვედრება შენს წინაშე, მიხსენი შენი აღთქმით!

¹⁷¹წარმოთქვამენ ჩემი ბაგენი ქებას, რადგან მასწავლე წესდებანი შენი.

¹⁷²იტყვის ჩემი ენა შენს ნათქვამს, რადგან ყველა შენი მცნება სიმართლეა.

¹⁷³იყოს შენი ხელი ჩემდა შემწედ, რადგან შენი ბრძანებანი ამოვირჩიე.

¹⁷⁴ვნატრობდი შენს შველას, უფალო, და შენი რჯული სასიამოვნოა ჩემთვის.

¹⁷⁵იცოცხლოს ჩემმა სულმა და გაქოს შენ, და შენი განგებულება შემეწიოს.

¹⁷⁶დავიბენი, ვითარცა ცხვარი დაკარგული; რადგან მცნებანი შენნი არ დავივიწყე!

Read ბიბლია ფსალმ. 118 Bible Online

ფსალმ. 118 - ბიბლია bible

ფსალმ. 118