Read ბიბლია ფსალმ. 138 Bible Online

ფსალმ. 138 - ბიბლია bible

ფსალმ. 138

¹გუნდის ლოტბარს. დავითის ფსალმუნი. უფალო, გამომცადე და მიცნობ მე.

²შენთვის ცნობილია, როდის ვჯდები და ვდგები; გაგებული გაქვს ჩემი ზრახვანი შორიდან.

³ჩემს სიარულსა და ჩემს წოლას შენ განსაზღვრავ, და ყველა ჩემი გზა შენ გამოიკვლიე.

⁴თუნდაც ჯერ არ იყოს სიტყვა ჩემს ენაზე, შენ უკვე იცი, უფალო, სრულად.

⁵უკნიდან და წინიდან გარემომიცავი და დადე ჩემზე ხელი შენი.

⁶მაოცებს — როგორ შემიცან ასე, მაღალია, ვერ შევწვდები მას.

⁷საით წაუვალ შენს სულს და შენს სახეს სად გავექცევი?

⁸ზეცაში რომ ავიდე, შენ იქა ხარ, ქვესკნელში ჩავიდე — იქაც ხარ შენ!

⁹ფრთანი გამოვისხა განთიადისა, დავსახლდე ზღვის კიდეზე,

¹⁰იქაც შენი ხელი წამიძღვება და შემივრდომებს მარჯვენა შენი!

¹¹და ვიტყვი: „იქნებ ბნელმა დამფაროს და ღამე იქნას სინათლედ ჩემს ირგვლივ.“

¹²სიბნელეც არაა წყვდიადი შენთვის, და ღამე დღესავით განათდება; რა სიბნელე და რა სინათლე!

¹³რადგან შენ დაბადე თირკმელნი ჩემნი, შენ გამომძერწე დედაჩემის წიაღში.

¹⁴გადიდებ, რადგან საოცრებით შემქმენი; საკვირველია საქმენი შენნი, და ჩემმა სულმა იცის ეს სავსებით.

¹⁵არ დაფარულა ჩემი ძვლები შენგან, როცა ჩავისახე იდუმალებაში, შევნივთდი ქვესკნელში.

¹⁶ჩემი ჩანასახი იხილეს შენმა თვალებმა და შენს წიგნში ჩაწერილია დღენი მომავლისა ჩემისა, როცა ჯერ არ იყო არც ერთი მათგანი.

¹⁷ხოლო ჩემთვის რაოდენ მრავლისმთქმელია რაოდენ დიდია რიცხვი მათი!

¹⁸დავთვალო, ქვიშაზე უმრავლესია; გავიღვიძებ და, ისევ შენთან ვარ!

¹⁹ნეტამც მოსრავდე, ღმერთო, ბოროტს! და გამშორდებოდნენ სისხლის მსმელები!

²⁰ავს რომ უბნობენ შენზე და ბოროტად სარგებლობენ შენი სახელით.

²¹არ უნდა მოვიძულო, უფალო, შენი მოძულენი, და შენს მოდავეებს არ უნდა ვედაო?

²²სრული სიძულვილით მოვიძულე ისინი, და მტრებად მექცნენ მე.

²³გამომცადე, უფალო, და შეიცან გული ჩემი; შემამოწმე და შეიცან აზრები ჩემი.

²⁴ნახე, ბოროტების გზაზე ხომ არ ვდგავარ, და წამიძეხი მარადიულ გზაზე!