Read ბიბლია ფსალმ. 144 Bible Online

ფსალმ. 144 - ბიბლია bible

ფსალმ. 144

¹ხოტბა დავითისა. აღგამაღლებ შენ, ჩემო ღმერთო და მეფეო, და ვაკურთხებ შენს სახელს უკუნითი უკუნისამდე.

²ყოველდღე გაკურთხებ შენ და ვადიდებ შენს სახელს უკუნითი უკუნისამდე.

³დიდია უფალი და ქებულია ფრიად, და მისი სიდიადე მიუწვდომელია.

⁴თაობა თაობას უქებს შენს საქმეებს და შენს სიძლიერეზე მოუთხრობენ.

⁵შენს დიდმშვენიერებაზე, შენს დიდებაზე, შენს საოცარ საქმეებზე ვილაპარაკებ.

⁶შენთა საშიშროებათა სიძლიერეს იტყვიან, ხოლო მე შენს სიდიადეზე ვილაპარაკებ.

⁷ხსენებას შენი მრავალი სიკეთისას გამოთქვამენ, და შენს სიმართლეს უმღერებენ.

⁸გულმოწყალე და შემბრალეა უფალი, სულგრძელი და დიდად მოწყალე.

⁹კარგია უფალი ყველას მიმართ და მისი წყალობაა ყველა მის ნამოქმედარზე.

¹⁰გადიდებდეს შენ, უფალო, ყველა შენი ნამოქმედარი, და შენი უბიწონი გადიდებენ შენ.

¹¹შენი მეფობის დიდებას იტყვიან, და შენს სიძლიერეზე ილაპარაკებენ,

¹²რათა აცნობონ ადამის ძეთ შენი სიძლიერე და ბრწყინვალე დიდება შენი მეფობისა.

¹³შენი მეფობა — მეფობა ყველა საუკუნისა და შენი ბატონობა — თაობებში.

¹⁴უფალი შემწეა ყველა დაცემულისა და გამმართავი ყველა წელში მოხრილისა.

¹⁵ყველას თვალები შენ შემოგცქერიან და შენ აძლევ მათ საზრდოს თავის დროზე.

¹⁶აღაპყრობ შენს ხელს და დააკმაყოფილებ ყოველ სულდგმულს.

¹⁷მართალია უფალი ყველა თავის გზაზე და მოწყალეა ყველა თავის საქმეში.

¹⁸ახლოსაა უფალი ყველა მის მლოცველთან, ყოველთან, ვინც მას მოუხმობს ჭეშმარიტებით.

¹⁹მის მოშიშთა სურვილს შეასრულებს და მათს ღაღადისს მოისმენს და უშველის მათ.

²⁰იცავს უფალი ყველა მის მოყვარულს და ყველა ბოროტს მოსპობს.

²¹ხოტბას უფლისას ილაპარაკებს პირი ჩემი, და აქებს ყოველი ხორციელი უკუნითი უკუნისამდე!