Read ბიბლია ფსალმ. 146 Bible Online

ფსალმ. 146 - ბიბლია bible

ფსალმ. 146

¹ადიდეთ უფალი! რადგან კარგია. განდიდება ჩვენი უფლისა: რადგან სასურველია, შეშვენის ქება-დიდება.

²ააშენებს იერუსალიმს უფალი, განდევნილებს ისრაელისას შემოკრებს.

³განკურნავს გულგატეხილებს და ჭრილობებს შეუხვევს მათ.

⁴იგი თვლის ვარსკვლავთა რიცხვს, ყველას თავის სახელს უწოდებს.

⁵დიდია უფალი და დიდძალოვანი, მისი გონიერება განუზომელია.

⁶გაამხნევებს მორჩილებს უფალი. ბოროტეულებს დაამდაბლებს მიწამდე.

⁷გაეხმიანეთ უფალს მადლობის გალობით, უგალობეთ ჩვენს ღმერთს ქნარით,

⁸რომელიც ფარავს ცას ღრუბლებით, ამზადებს დედამიწისათვის წვიმას, აღმოაცენებს მთებში ბალახს;

⁹აძლევს პირუტყვს თავის საზრდოს, ყორნის ბახალებს — რომელნიც მოუხმობენ მას.

¹⁰არც ცხენის ძლიერებას ისურვებს, არც კაცის მუხლმაგრობას ინებებს.

¹¹ისურვებს უფალი თავის მოშიშებს, მისი წყალობის მოიმედეებს.