Read ბიბლია ფსალმ. 18 Bible Online

ფსალმ. 18 - ბიბლია bible

ფსალმ. 18

¹გუნდის ლოტბარს. ფსალმუნი დავითისა.

²ცანი ღაღადებენ ღმერთის დიდებას, და მისთა ხელთა ნამოქმედარს გვამცნობს სამყარო.

³დღე დღეს გადასცემს სიტყვას, ღამე კი ღამეს უმხელს აზრს,

⁴არც ენა უნდა და არც სიტყვა, მათი ხმა რომ ისმოდეს.

⁵მთელი დედამიწის ზურგზე გადის მათი ხაზი და სამყაროს კიდეებამდე აღწევს მათი სიტყვები; მზეს დაუდგა კარავი მათში.

⁶და ის ვითარცა ნეფე, გამოდის საქორწინო გავალაკიდან; იხარებს ვითარცა გმირი გარბენას გზისას.

⁷ცათა კიდიდან არის მისი აღმოსავალი და მისი ბრუნვა — მათ კიდეებამდე, და ვერაფერი ემალება მის მხურვალებას.

⁸რჯული უფლისა სრულყოფილია, სულს განამტკიცებს; მცნება უფლისა ჭეშმარიტია, გააგონიერებს მიამიტებს.

⁹მართებულია უფლის ბრძანებანი, გულს ახარებენ; მცნება უფლისა სპეტაკია, შუქს აძლევს თვალებს.

¹⁰შიში უფლისა წმიდა არის, მარადიული. უფლის განსჯანი ჭეშმარიტნი, მართალნი ერთობ.

¹¹სასურველნი არიან ოქროზე და თვით ბაჯაღლოზე მეტად და უტკბილესნი თაფლისა და გოლეულისა.

¹²და შენი მორჩილი მათით არის განათლებული; დიდია საზღაური მათი დაცვისათვის.

¹³ვინ გულისხმა-ჰყოს შეცდომანი? განმწმიდე მე დაფარულთაგან.

¹⁴ნებლიე ცოდვებს განაშორე მსახური შენი, რათა არ გაბატონდნენ ჩემზე; მაშინ უმწიკვლო შევიქმნები, და თავს დავაღწევ დიდ ცოდვას.

¹⁵დაე, იყოს შენთვის სასურველი სიტყვანი ჩემი პირისა და ზრახვანი ჩემი გულისა, უფალო, ბურჯო და დამხსნელო ჩემო.