Read ბიბლია ფსალმ. 21 Bible Online

ფსალმ. 21 - ბიბლია bible

ფსალმ. 21

¹გუნდის ლოტბარს. „ცისკრის აღმობრწყინებისას“. ფსალმუნი დავითისა.

²ღმერთო ჩემო! ღმერთო ჩემო! რად მიმატოვე? მე შემოგღაღადებ, მაგრამ შორს არის ჩემი შველა.

³ღმერთო ჩემო! მოგიხმობ დღისით და არ მპასუხობ, ღამით — და არ არის სიმშვიდე ჩემთვის.

⁴შენ კი, წმიდაო, მკვიდრობ ისრაელის ხოტბათა შორის.

⁵შენით იმედოვნებდნენ ჩვენი მამები, იმედოვნებდნენ და იხსენი კიდეც.

⁶შენ გევედრებოდნენ და გადარჩნენ; შენით იმედოვნებდნენ და არ გაწბილდნენ.

⁷მე კი მატლი ვარ და არა კაცი, საძრახისი ადამიანთა და საძულველი ერისა.

⁸ყველა, ვინც მხედავს, მე დამცინის; მქირდავენ და თავს აქნევენ:

⁹„უფალს მიენდო? მაშ მანვე იხსნას, მანვე უშველოს თავის სასურველს.“

¹⁰რადგან შენ გამომიყვანე დედის მუცლიდან, დამამშვიდე დედის მკერდზე.

¹¹შენით ვიმედოვნებდი დედის მუცლიდან; დედის წიაღიდან შენ ხარ ჩემი ღმერთი.

¹²ნუ განმშორდები, რაკი ახლოა უბედურება, ხოლო შემწე არავინ არის.

¹³ირგვლივ მომადგნენ მე ძლიერი მოზვრები, ბაშანის ხარებმა რკალი შემომარტყეს.

¹⁴პირი დააღეს ჩემს წინააღმდეგ, ვითარცა ლომმა,

¹⁵ვითარცა წყალი დავიღვარე და დაიშალნენ ჩემი ძვლები; ცვილს დაემსგავსა ჩემი გული,

¹⁶გამოიფიტა ჩემი ძალა, ვითარცა თიხა; ენა სასაზე მიმეკრა, და ჩამიყვანე სიკვდილის მიწა-მტვრამდე.

¹⁷რადგან გარს შემომეხვივნენ მე ძაღლები; ბოროტთა ხროვა წრედ შემომერტყა, გამიხვრიტეს ხელნი და ფერხნი.

¹⁸მთელი ჩემი ძვლები დაითვლება; ისინი მიჭვრეტენ ნიშნის მოგებით.

¹⁹ჩემს სამოსელს ინაწილებენ და წილს ყრიან ჩემს კვართზე.

²⁰და შენ, უფალო, ნუ დამშორდები; სიმძლავრევ ჩემო, ჩემდა შემწედ გამოეშურე.

²¹გადაარჩინე ჩემი სული მახვილისაგან და ძაღლთაგან ჩემი სიცოცხლე.

²²მიხსენი ლომის ხახისაგან და მარტორქის რქისაგან!

²³ჩემს ძმებს მოვუთხრობ შენს სახელზე, კრებულთა შორის შეგაქებ შენ.

²⁴უფლის მოშიშნო, ადიდეთ იგი; პატივი სცეს იაკობის მთელმა მოდგმამ და გეშინოდეთ მის წინაშე, ისრაელის მთელო მოდგმავ!

²⁵რადგან არ დაამცირა მან და არ უგულებელყო ტანჯვა გლახაკისა, და არ მოარიდა პირი თავისი, და უსმინა მას, როცა მოუხმობდა.

²⁶მინდა შეგასხა ხოტბა მრავალ კრებულში, მისთა მოშიშთა წინაშე გადავიხდი აღთქმულს.

²⁷ჭამონ ღატაკთ და გაძღნენ, ადიდონ უფალი მისმა მაძიებლებმა; სამარადჟამოდ იცოცხლონ თქვენმა გულებმა.

²⁸გაიხსენებენ და უფალთან დაბრუნდებიან და თაყვანს სცემს ყველა ტომი ხალხებისა.

²⁹რამეთუ უფალს შვენის მეფობა და ის არის ხალხთა მბრძანებელი.

³⁰ჭამს და თაყვანს სცემს ამ ქვეყნის ყველა გათქვირებული, მის წინაშე ქედს მოიხრის ყველა, ვინც მტვრად უნდა იქცეს, ვისაც არ ძალუძს თავისი სულის გადარჩენა.

³¹შთამომავლობა ემსახუროს მას; მოუთხრობს თაობებს უფლის შესახებ.

³²მოვლენ და მოუყვებიან მის სიმართლეს ხალხს, რაც მოიმოქმედა უფალმა.