Read ბიბლია ფსალმ. 29 Bible Online

ფსალმ. 29 - ბიბლია bible

ფსალმ. 29

¹ფსალმუნი. ქება ტაძრის განახლებისა. დავითისა.

²განგადიდებ შენ, უფალო, რადგან მიხსენი და ჩემზე მტრები არ გაახარე.

³უფალო, ღმერთო ჩემო, მოგიხმე და შენ განმკურნე მე.

⁴უფალო, შენ ამოიყვანე სული ჩემი ჯოჯოხეთიდან, და გამაცოცხლე, რომ საფლავში არ ჩავსულიყავ.

⁵უგალობეთ უფალს, მისო წმიდებო, ადიდეთ ხსენება მისი სიწმიდისა.

⁶რადგან წამიერია რისხვა მისი, ხოლო სიცოცხლე — მისი სურვილით; ღამით გლოვა დაისადგურებს და ცისკრის ჟამს მხიარულება.

⁷და მე ვთქვი ჩემი ნეტარების ჟამს: „არ დავეცემი უკუნისამდე.“

⁸შენი სურვილით, უფალო, გადაარჩინე ჩემი მთა; დაფარე შენი სახე და — შევძრწუნდი.

⁹შენ მოგიხმობ, უფალო, და ჩემს ბატონს შევევედრები:

¹⁰„რა სარგებლობა იქნება ჩემს სისხლში, როდესაც საფლავში ჩავალ? განა მტვერი შეგასხამს ხოტბას? განა შენს ჭეშმარიტებას განაცხადებს?

¹¹უფალო, მომისმინე და შემიწყალე, იყავი შემწე ჩემი.“

¹²შენ ჩემი წუხილი როკვად მიქციე, ძაძა გამხადე და სიხარულით შემმოსე.

¹³ამისათვის გიგალობებს სული ჩემი და არ დადუმდება. უფალო, ღმერთო ჩემო, შენ გადიდებ უკუნისამდე!