Read ბიბლია ფსალმ. 33 Bible Online

ფსალმ. 33 - ბიბლია bible

ფსალმ. 33

¹დავითისა. როცა სიგიჟე მოიგონა აბიმელექის წინაშე, განიდევნა და წავიდა.

²განვადიდებ უფალს ყოველჟამს, მარადისია მისი ქება ჩემს ბაგეებზე.

³უფლით იქადის ჩემი სული; მოისმენენ მშვიდნი და გაიხარებენ.

⁴ადიდეთ უფალი ჩემთან ერთად და განვადიდოთ მისი სახელი ერთობლივად.

⁵მე მოვიძიე უფალი და მიპასუხა და გამომიხსნა ყველა ჩემი განსაცდელიდან.

⁶მისი შემყურენი განათებულან და მათი პირი არ შერცხვენილა.

⁷აგერ გლახაკმა მოუხმო და უფალმა მოისმინა და ყველა გასაჭირისაგან იხსნა.

⁸დაიბანაკებს ანგელოზი უფლისა მის მოშიშთა ირგვლივ და გადაარჩნს მათ.

⁹განიცადეთ და ნახეთ, რომ კარგია უფალი; ნეტარება მას, ვინც მასზეა მინდობილი.

¹⁰მოიშიშეთ უფლისა, წმიდანნო მისნო, რადგან არა აქვთ შეჭირვება მოშიშთა მისთა.

¹¹მდიდარნი გაღატაკდებიან და დაიმშევიან, ხოლო უფლის მაძიებლებს არავითარი სიკეთე არ მოაკლდებათ.

¹²მოდით, შვილებო, მომისმინეთ! უფლის მოშიშებას გასწავლით თქვენ.

¹³ვინ არის კაცი, რომელსაც სურს სიცოცხლე, უყვარს დღეგრძელობა სიკეთის სანახავად?

¹⁴შეიკავე შენი ენა სიბოროტისაგან და ბაგენი შენნი — ცბიერი სიტყვებისაგან.

¹⁵ერიდე ბოროტებას და ჰქმენ კეთილი; ეძიე მშვიდობა და მიჰყევი მას.

¹⁶უფლის თვალები მიპყრობილია წმიდებისაკენ და მისი ყურები — მათი ღაღადისაკენ.

¹⁷პირი უფლისა — ბოროტმოქმედთა წინააღმდეგ, რათა წარხოცოს დედამიწიდან მათი სახსენებელი.

¹⁸მოუხმობენ და ისმენს უფალი, და იხსნის ყველა გასაჭირისაგან.

¹⁹ახლოა უფალი გულმოდრეკილებთან, და სულით მორჩილებს იხსნის.

²⁰მრავალი სიავე ხვდება მართალს; და ყველაფრისაგან იხსნის უფალი.

²¹ის იცავს მის ყოველ ძვალს, მათგან ერთიც არ შეიმუსრება.

²²მოკლავს ცოდვილს ბოროტება, ხოლო მართლის მოძულენი პასუხს აგებენ.

²³იხსნის უფალი თავის მორჩილთა სულებს და პასუხს არ აგებენ, ვინც მასზეა მინდობილი.