Read ბიბლია ფსალმ. 35 Bible Online

ფსალმ. 35 - ბიბლია bible

ფსალმ. 35

¹გუნდის ლოტბარს. უფლის მორჩილის, დავითისა.

²ბიწიერება ცოდვილისა ამბობს ჩემს გულში: არ არის შიში ღმერთისა მის თვალთა წინაშე.

³რადგან ქლესაობს მასთან, თითქოს ეძებს მის დანაშაულს, რომ შეაძულოს.

⁴მისთა ბაგეთა სიტყვები სიცრუე და სიყალბეა, ჭკუა არ ყოფნის, რომ კეთილი ქნას.

⁵უსამართლობას ფიქრობს თავის სარეცელზე, უკეთურ გზას ადგება, ბოროტს არ თაკილობს.

⁶უფალო, ზეცამდეა შენი წყალობა, ჭეშმარიტება შენი — ღრუბლებამდე.

⁷სიმართლე შენი, ვითარცა მთები უფლისა, სამართალი შენი — ღრმა უფსკრულივით. ადამიანსა და პირუტყვს შენ შველი, უფალო.

⁸რაოდენ ძვირფასია შენი წყალობა, ღმერთო, და ადამის ძენი შენი ფრთების ქვეშ აფარებენ თავს.

⁹დაპურდებიან შენი სახლის ცხიმით და შენთა სიტკბოთა ხევიდან შეასმევ მათ.

¹⁰რადგან შენთან არის წყარო სიცოცხლისა, შენი შუქით ვხედავთ სინათლეს.

¹¹მოჰფინე წყალობა შენი შენს მაღიარებლებს, და სიმართლე შენი — გულწრფელებს.

¹²ნუ მოაღწევს ჩემთან ფეხი ამპარტავნისა, და ხელი ბოროტთა ნუ განმდევნის მე.

¹³იქ დაეცნენ მოქმედნი უსამართლობისა, დაენარცხნენ და აღარ ძალუძთ წამოდგომა.