Read ბიბლია ფსალმ. 44 Bible Online

ფსალმ. 44 - ბიბლია bible

ფსალმ. 44

¹გუნდის ლოტბარს. „შოშანისებურად“ კორახის ძეთა. მოძღვრება; გალობა სიყვარულისა.

²აღმოთქვა ჩემმა გულმა ნაზი სიმღერა რასაც მე ვამბობ, მეფეს ეკუთვნის; ჩემი ენა კალამია ხელოვანი მწერლისა.

³ადამის ძეთა უმშვენესი ხარ, მადლი იღვრება შენთა ბაგეთაგან, რადგან გაკურთხა ღმერთმა უკუნისამდე.

⁴წელზე შეიბი მახვილი, გმირო, შენი დიდებით და შენი მშვენებით.

⁵და ამ შენი მშვენებით დაბრძანდი ჭეშმარიტების, თვინიერებისა და სიმართლის გულისათვის, და გიჩვენებს საოცრებას მარჯვენა შენი.

⁶შენი ისრები წამახულია, ხალხები ეცემიან შენს ფეხქვეშ; გულში ერჭობიან მეფის მტრებს.

⁷ტახტი შენი, ღმერთო, უკუნითი უკუნისამდეა. სამართლის კვერთხია კვერთხი შენი მეუფებისა.

⁸შენ შეიყვარე სიმართლე და შეიძულე ბოროტება; ამიტომ გცხო ღმერთმა, შენმა ღმერთმა, სიხარულის ზეთი შენს მეგობრებზე უმეტეს.

⁹მთელი შენი სამოსი — ვითარცა მური, ალოე და კასია; სპილოს ძვლის დარბაზებიდან გაგამხიარულებენ შენ.

¹⁰მეფეთა ასულები შენს დიდებულებს შორის არიან; შენს მარჯვნივ დადგა დედოფალი ოფირის ოქროთი შემკული.

¹¹მისმინე, ასულო, გამოიხედე და მომაპყარ ყური. და დაივიწყე ხალხი შენი

¹²და დატკბება მეფე შენი მშვენებით — რადგან ის არის შენი უფალი, — და თაყვანი ეცი მას.

¹³და ასულნი ცორისა ძღვენით მოვლენ; მუდარას დაგიწყებენ ერის მდიდარნი.

¹⁴მთელი დიდება მეფის ასულისა შიგნითაა; მოოქროვილია მისი სამოსი.

¹⁵მოქარგული კაბით მოჰყავთ იგი მეფესთან; მის უკან ქალწულნი, დობილნი მისნი, მოჰყავთ შენთან.

¹⁶მოჰყავთ სიხარულით და ლხინით, შედიან მეფის სასახლეში.

¹⁷შენს წინაპართა ადგილას იქნებიან ძენი შენნი; მათ დააყენებ მთავრებად მთელს ქვეყანაზე.

¹⁸გავიხსენებ შენს სახელს თაობიდან თაობაში, ამიტომ ხალხები ხოტბას შეგასხამენ უკუნითი უკუნისამდე.