Read ბიბლია ფსალმ. 50 Bible Online

ფსალმ. 50 - ბიბლია bible

ფსალმ. 50

¹გუნდის ლოტბარს. დავითის ფსალმუნი.

²რაჟამს მივიდა მასთან ნათან წინასწარმეტყველი, მას შემდეგ, რაც ბათ-შებაყთან შევიდა.

³შემიწყალე, ღმერთო, შენი მრავალი შემბრალებლობისამებრ წაშალე ჩემი დანაშაული.

⁴მრავლად განმბანე ჩემი ბრალისაგან და ჩემი ცოდვისაგან განმწმიდე;

⁵რადგან ვიცი ჩემი დანაშაული, და ჩემი ცოდვა მუდამ თვალწინ მიდგას.

⁶შენ, მხოლოდ შენ შემოგცოდე და ბოროტება ჩავიდინე შენს თვალში, ამიტომ მართალი ხარ შენს სიტყვებში და სწორი — შენს სამართალში.

⁷აჰა, უკანონოდ ჩავისახე და ცოდვით დაორსულდა ჩემზე დედაჩემი.

⁸აჰა, შენ შეიყვარე ჭეშმარიტება გულით და გამაგებინე სიბრძნე ფარული.

⁹მასხურე უსუპით და განვიწმიდები; განმბანე და თოვლზე მეტად განვსპეტაკდები.

¹⁰მომასმენინე ლხინი და მხიარულება, გაახარე ჩემი ძვლები, შენ რომ დათრგუნე.

¹¹სახე აარიდე ჩემს შეცდომებს და ყველა ჩემი ბრალი წაშალე.

¹²სუფთა გული შეჰქმენი ჩემში, ღმერთო, და წრფელი სული განაახლე ჩემს სხეულში.

¹³ნუ უკუმაგდებ შენგან და ნუ წამართმევ შენი სიწმიდის სულს.

¹⁴დამიბრუნე სიხარული შენი ხსნით, და დიდებული სულით გამამაგრე.

¹⁵ვასწავლი დამნაშავეებს შენს გზებს, და ცოდვილნი დაბრუნდებიან შენთან.

¹⁶მიხსენ სისხლთაგან, ღმერთო, ღმერთო ჩემი ხსნისა, და ჩემი ენა ხოტბას შეასხამს შენს სიმართლეს.

¹⁷უფალო, გახსენი ჩემი ბაგენი, რომ ჩემთა ბაგეთა თქვან შენი ქება.

¹⁸რადგან მსხვერპლი არა გსურს, რომ შემოგწირო, და სრულადდასაწველს არ ინებებ.

¹⁹შესაწირავი ღმერთისა — სული მოდრეკილი. მოდრეკილისა და მორჩილის გული არ დაამცირო, ღმერთო.

²⁰კეთილი უყავ შენი სურვილით სიონს, ააშენე გალავნები იერუსალიმისა.

²¹მაშინ ისურვებ სიმართლის შესაწირავებს, და სრულადდასაწველს; მაშინ აიტანენ შენს სამსხვერპლოზე ზვარაკებს.