Read ბიბლია ფსალმ. 54 Bible Online

ფსალმ. 54 - ბიბლია bible

ფსალმ. 54

¹გუნდის ლოტბარს. სიმებიან საკრავზე. მოძღვრება დავითისა.

²ისმინე, ღმერთო, ჩემი ლოცვა და ნუ განუდგები ჩემს ვედრებას.

³ყური მომაპყარ და მიპასუხე; ავტირდები ჩემს საუბარში და ავღაღადდები.

⁴მტრის ხმისაგან, ბოროტის მიერ შევიწროებისაგან; რადგან თავს მახვევენ სიმრუდეს და სიძულვილით მირისხდებიან.

⁵ჩემი გული თრთის ჩემს შიგნით და სიკვდილის საშინელება დამატყდა თავს.

⁶შიში და ძრწოლა მოდის ჩემზე და შიშის ზარი მიპყრობს.

⁷და ვამბობ: „რომ მქონოდა მტრედის ფრთები, გავფრინდებოდი და დავბინავდებოდი;

⁸აჰა, შორს გადავიხვეწებოდი, უდაბნოში დავიდებდი ბინას;

⁹ავჩქარდებოდი რომ მომენახა თავშესაფარი

¹⁰მოსპე, უფალო, დაყავი მათი ენები; რადგანაც ვხედავ ძალადობას და შუღლს ქალაქში.

¹¹დღედაღამ გარსუვლიან მის კედლებს, სიმრუდე და წვალებაა მის შიგნით,

¹²ბოროტებაა მის შიგნით და არ სცილდება მის ქუჩებს სიცრუე და ვერაგობა.

¹³რადგან ვინც მე მლანძღავს ჩემი მტერი არ არის — იმას ავიტანდი; ჩემი მოძულე კი არ განდიდებულა ჩემზე — მას დავემალებოდი;

¹⁴მაგრამ შენ შენა ხარ ის, კაცი ჩემი სწორი, ამხანაგი და მეგობარი ჩემი.

¹⁵ერთად რომ ვსაუბრობდით ტკბილად, ღვთის სახლში დავდიოდით ბრბოს შორის.

¹⁶დაატყდეს მათ სიკვდილი, ცოცხლად ჩავიდნენ ჯოჯოხეთში, რადგან ბოროტებაა მათს სადგომში, მათს გულში.

¹⁷ხოლო მე მოვუხმობ ღმერთს, და უფალი მიშველის.

¹⁸საღამოთი, დილით და შუადღისას შევევედრები და მოისმენს ჩემს ხმას.

¹⁹მან მშვიდობიანად დაიხსნა ჩემი სული მათგან, მე რომ მებრძოდნენ, რადგან ბევრნი იყვნენ ჩემზე აღმდგარნი.

²⁰მოისმენს ღმერთი და უპასუხებს მათ დასაბამიდან მყოფი … რადგან არ არის ცვლილება მათში და არ ეშინიათ ღმერთისა.

²¹ხელი გაიწოდეს მათთვის მშვიდობის დაარღვიეს მისი აღთქმა.

²²ცხიმზე ჩვილია მათი ბაგეები, ზეთზე რბილია მათი სიტყვები, მაგრამ ისინი გაშიშვლებული ხმლებია.

²³მიანდე უფალს შენი საზრუნავი და ის შეგეხიდება, იგი არასოდეს არ დაუშვებს წმიდის წაბორძიკებას.

²⁴ღმერთო, შენ ჩაგყავს ისინი ჯოჯოხეთში; სისხლის მოყვარულნი და ვერაგნი ნუ მიაღწევენ თავიანთ დღეთა ნახევარს; ხოლო მე შენ გესავ.