Read ბიბლია ფსალმ. 55 Bible Online

ფსალმ. 55 - ბიბლია bible

ფსალმ. 55

¹გუნდის ლოტბარს. „მტრედზე, რომელიც მდუმარებს შორეთში.“ დავითის ძეგლისწერა, როცა ფილისტიმელებმა შეიპყრეს იგი გათში.

²შემიწყალე, ღმერთო, რადგან გათელვას მიპირებს კაცი, ყოველდღე მავიწროებს მოშუღარი.

³ჩანთქმას მითქვამენ ჩემი მტრები ყოველდღიურად, რადგან მრავალი მეომება მაღლით.

⁴საშიშროების დღეს შენ მოგენდობი.

⁵ღმერთში ვადიდებ მისსავე სიტყვას, ღმერთზე ვარ მინდობილი და არ მეშინია, რას მიზამს ხორციელი?

⁶ყოველდღე ამახინჯებს ჩემს სიტყვებს; ბოროტია ყოველი მათი ზრახვა ჩემს მომართ.

⁷გროვდებიან, მისაფრდებიან ისინი — ჩემი მდევრები, თითქოსდა ჩემს სულს ელოდებიან.

⁸ნუთუ ამ სიმრუდეს უნდა გადაურჩნენ? რისხვით დაამხე ერები, ღმერთო!

⁹ჩემი ხეტიალი გამოთვლილი გაქვს; შენს ჭურჭელში მოათავსე ჩემი ცრემლები! განა შენს წიგნში არ არიან ისინი?

¹⁰მაშინ უკუიქცევიან ჩემი მტრები, ეს ვიცი, რომ ღმერთი ჩემთან არის.

¹¹ღმერთის მიერ შევაქებ სიტყვას, უფლის მიერ შევაქებ სიტყვას.

¹²ღმერთს მივენდე — არ მეშინია; რას მიზამს კაცი?

¹³ჩემზეა, ღმერთო, ჩემი აღთქმები, შენ რომ აღგითქვი; დიდებას მოგიზღავ შენ.

¹⁴რამეთუ იხსენი ჩემი სული სიკვდილისაგან, ჩემი ფეხი — წაბორძიკებისაგან, რათა ვიარო ღმერთის წინაშე სიცოცხლის შუქით.