Read ბიბლია ფსალმ. 63 Bible Online

ფსალმ. 63 - ბიბლია bible

ფსალმ. 63

¹გუნდის ლოტბარს. ფსალმუნი დავითისა.

²ისმინე, ღმერთო, ჩემი ხმა, როცა ვლოცულობ; მტრის შიშისაგან დაიცავი ჩემი სიცოცხლე.

³დამიფარე ვერაგთა საიდუმლო ზრახვათაგან, სიმრუდის მოქმედთა ამბოხისაგან.

⁴რომელთაც ენა მახვილივით გაილესეს, მოზიდეს თავიანთი მშვილდი — მწარე სიტყვა,

⁵რათა საფრიდან ესროლონ უდანაშაულოს; მოულოდნელად ესვრიან და არ ეშინიათ.

⁶ძალას მოიკრებენ ცუდი საქმისათვის, მოითათბირებენ მახეების დაგებას, ამბობენ: „ვინ შეამჩნევს მათ?“

⁷სიმრუდეს ფიქრობენ: „ჩვენ მზადა ვართ, საიდუმლოდ დავიცავთ ჩვენს გეგმას“. ხოლო შიგანი კაცისა და გული ღრმაა.

⁸და ესვრის ღმერთი ისარს, უეცრად დაწყლულდებიან.

⁹საკუთარი ენა დაამარცხებს მათ; გაიფანტება ყოველი მათი მხილველი.

¹⁰და შეშინდება ყველა კაცი და ილაპარაკებენ ღმერთის ნამოქმედარზე, და მის ნაქნარს ჩაუკვირდებიან.

¹¹გაიხარებს მართალი უფალში და დაიქადებენ გულმართლები.