Read ბიბლია ფსალმ. 67 Bible Online

ფსალმ. 67 - ბიბლია bible

ფსალმ. 67

¹გუნდის ლოტბარს. დავითისა. ფსალმუნი საგალობელისა.

²აღდგეს ღმერთი, რომ განიბნენ მისი მტრები, და მისი მოძულენი უკუიქცნენ მისგან.

³როგორც კვამლი გაიფანტება, ისე გაფანტე; როგორც ცვილი დადნება ცეცხლზე, ისე დაიღუპებიან ბოროტნი ღმერთის სახის წინაშე.

⁴ხოლო მართალნი გაიხარებენ და მოილხენენ ღმერთის წინაშე, და სიხარულით იზეიმებენ.

⁵აქეთ ღმერთი, უგალობეთ მის სახელს! გზა მოუმზადეთ მას, ვინც უდაბნოებს სერავს; უფალია მისი სახელი; ილხინეთ მის წინაშე.

⁶იგია მამა ობოლთა და მსაჯული ქვრივთა, ღმერთი, მის საწმიდარში რომ დაივანებს;

⁷ღმერთი, რომელიც ბინას აძლევს ეულებს, გამოჰყავს ტყვეები შესაფერის დროს, ხოლო ურჩნი ხრიოკზე რჩებიან.

⁸ღმერთო, როცა შენი ერის წინაშე გამოხვედი, როცა ფეხი დადგი უდაბნოში,

⁹დედამიწა შეირყა, ცანიც კი წვეთავდნენ ღმერთის სახის წინაშე; ეს სინაიც — ღმერთის წინაშე, ისრაელის ღმერთისა.

¹⁰ბარაქიანი წვიმა აწვიმე, ღმერთო, შენს სამკვიდროს, და თუ დაუძლურდება, შენ გაამაგრებ.

¹¹შენმა ოჯახმა იქ ჰპოვა ბინა, რომელიც შენი სიკეთით განუმზადე ღარიბს, ღმერთო.

¹²უფალი იძლევა სიტყვას მახარობელთა, დიდი გუნდია მახარობელ ქალთა!

¹³ჯარების მეფენი გარბიან, გარბიან, შინ მყოფი ქალი ნადავლს გაიყოფს.

¹⁴თუნდაც ცხვრის ბაკებში იწვეთ, მტრედის ფრთებს ვერცხლით დაფარულს ჰგავხართ და მის ნაკრტენს მოოქროვილს.

¹⁵როცა ყოვლისშემძლე გაფანტავს მეფეებს იქ, დათოვლავს ცალმონს.

¹⁶ბაშანის მთა — მთა ღმერთისა, ბაშანის მთა — მრავალმწვერვალიანი მთა.

¹⁷რატომ შეჰყურებთ შურით, მწვერვალებით მდიდარო მთებო, მთას, რომელიც ღმერთმა ისურვა თავის სამოსახლოდ, და უფალი დაიმკვიდრებს სამუდამოდ?

¹⁸ღმერთის ეტლები უთვალავია, და ათასეულები; მათ შორის არის უფალი სინაიზე, წმიდაში.

¹⁹შენ ახვედი მაღლა, დააბრუნე ტყვე, წამოიღე ძღვენი კაცთათვის, და ურჩებთანაც დაისადგურა უფალმა ღმერთმა.

²⁰კურთხეულ არს უფალი! დღითი დღე ზრუნავს ჩვენზე,

²¹ღმერთი არის ჩვენთვის ღმერთი მშველელი, და უფალი ღმერთის ხელში არის სიკვდილის გასაღები.

²²მაგრამ ღმერთი თავს გაუჭეჭყავს თავის მტრებს, აჯაგრულ კეფას — დანაშაულის გზით მოსიარულეს.

²³თქვა უფალმა: „ბაშანიდან დავაბრუნებ; დავაბრუნებ ზღვის სიღრმეებიდან,

²⁴რათა ჩადგა შენი ფეხი მტრების სისხლში, როგორც შენი ძაღლები ჩაყოფენ შიგ თავიანთ ენას“;

²⁵ნახეს შენი სვლა, ღმერთო, სვლა ჩემი ღმერთისა,

²⁶წინ წარდგნენ მგალობლები, უკან — მემუსიკენი, შუაში — მედაირე ქალწულები.

²⁷კრებულთა შორის ადიდეთ ღმერთი, უფალი

²⁸იქ ბენიამინი — უმრწემესი — წინ წახტა; იუდას მთავრებმა ქვები დაუშინეს, ზებულუნის მთავრებმა, ნაფთალის მთავრებმა.

²⁹შენმა ღმერთმა მოგაკუთვნა შენ ძალა, ღმერთო, განამტკიცე ის, რაც მოიმოქმედე ჩვენთვის.

³⁰შენი ტაძრის გამო, რომელიც იერუსალიმშია,

³¹შერისხე მხეცი ლერწმოვანისა, ხარების ჯოგი ხბორებს შორის იმ ხალხისა, რომლებიც ტრაბახობენ ვერცხლის ზოდებით. მიმოფანტე ომის მოყვარული ერები.

³²ამოვლენ მოციქულნი ეგვიპტიდან, ქუში გაუწოდებს ხელს.

³³ქვეყნიერების სამეფონო, უმღერეთ, უგალობეთ უფალს.

³⁴ამაღლებულს ძველთუძველეს ცათა ცაში! აჰა, ის გამოსცემს თავისი ხმით ძლიერების ხმას.

³⁵მიეცით სიძლიერე ღმერთს! მისი სიდიადე ისრაელზეა

³⁶საოცარი ხარ, ღმერთო, შენს ტაძარში. ღმერთი ისრაელისა — ის აძლევს ძალასა და სიმაგრეს ხალხს; კურთხეულ არს ღმერთი!