Read ბიბლია ფსალმ. 68 Bible Online

ფსალმ. 68 - ბიბლია bible

ფსალმ. 68

¹გუნდის ლოტბარს. „შოშანიმის“ ხმაზე. დავითისა.

²მიხსენი, ღმერთო, რადგან ყელამდე მომადგა წყალი.

³ჩავიძირე გაუვალ ლაფში და არ არსებობს დასადგომი; შევედი წყლის სიღრმეში და სწრაფმა დინებამ წამიღო.

⁴მოვიქანცე ღაღადით, ყელი გამიშრა, თვალები ამომიღამდა ჩემი ღმერთის მოლოდინში.

⁵უმიზეზოდ მოძულე უფრო მეტი მყავს, ვიდრე თმა მაქვს თავზე. გაძლიერდნენ ჩემი მოსპობის მსურველნი, ჩემზე ტყუილ-უბრალოდ გადამტერებულნი; რაც არ წამირთმევია, ის უნდა დავუბრუნო.

⁶ღმერთო, შენ უწყი ჩემი უვიცობა და ჩემი დანაშაული დაფარული არ არის შენგან.

⁷ნუ შერცხვებიან ჩემს გამო შენი მოიმედენი, ღმერთო, უფალო ძალთაო; ნუ გაწბილდებიან ჩემს გამო, ვინც შენ გეძებს, ღმერთო ისრაელისა.

⁸რადგანაც შენი გულისათვის მივიღე ლანძღვა, სირცხვილმა დაფარა ჩემი სახე.

⁹შორეული გავხდი ჩემი ძმებისათვის და უცხო — დედაჩემის შვილთათვის.

¹⁰რადგან შენი სახლის შურმა დამღრღნა მე და შენთა მლანძღველთა ლანძღვა დამატყდა თავს.

¹¹და ვტირი ჩემი სულის მარხვით, და მათი სალანძღავი გავხდი;

¹²და ჩავიცვი სამოსად ძაძა და იგავად ვიქეცი მათთვის.

¹³ჩემზე ლაპარაკობენ კარიბჭესთან მსხდომნი, და მღერიან ღვინის მსმელნი.

¹⁴და მე ვლოცულობ შენს მიმართ, უფალო, სასურველ დროს; ღმერთო, შენი დიდი წყალობით მიპასუხე შენი შველის ჭეშმარიტებით.

¹⁵მიხსენი ლავისგან, რომ არ დავინთქა; გადამარჩინე ჩემთა მოძულეთა და წყლის სიღრმეთაგან.

¹⁶ნუ გამიტაცებს წყლის ტალღა, და ნუ ჩამყლაპავს მორევი, და ნუ შეიკრავს ჩემზე პირს ჭა.

¹⁷მიპასუხე, უფალო, რადგან კარგია შენი წყალობა; შენი დიდი სიბრალულით გადმომხედე.

¹⁸ნუ დაფარავ სახეს შენი მორჩილისგან, რადგან მიჭირს;

¹⁹მოუახლოვდი ჩემს სულს, გადამარჩინე; ჩემი მტრების ჯიბრით მიხსენი.

²⁰შენ იცი, ჩემი გალანძღვა, შენს თვალწინ არიან ჩემი მტრები.

²¹დამცირებამ დაამსხვრია ჩემი გული და ქანცი გამიწყდა; ველოდი თანამგრძნობლებს და არავინ იყო, მანუგეშებელს და ვერ ვპოვე.

²²და აურიეს ჩემს საჭმელში ნაღველი, და წყურვილის დროს მასვეს ძმარი.

²³იყოს მათი ტაბლა მათთვის ხაფანგად და სიმშვიდის ჟამს — მახედ.

²⁴დაბნელდეს თვალნი მათნი და წელი მათი სამუდამოდ მოადუნე.

²⁵გადმოაფრქვიე მათზე შენი მრისხანება, და შენი რისხვის ალი ეწიოთ მათ.

²⁶სამკვიდრებელი მათი გაპარტახდეს, მათ კარვებში არ იყოს მკვიდრი!

²⁷ვინაიდან, ვინც შენ გვემე, დევნიან, და შენგან დაჭრილთა სატკივარს ამრავლებენ.

²⁸დაურთე ცოდვა მათს ცოდვას და ნუმც შეაღწევენ შენს სიმართლეში.

²⁹ამოიშალონ ცოცხალთა წიგნიდან და მართლებთან ნუ ჩაიწერებიან.

³⁰ხოლო მე ღარიბი და დავრდომილი ვარ. შენმა შველამ, ღმერთო, დამიფაროს მე.

³¹ვაქებ ღმერთის სახელს გალობით, განვადიდებ მადლიერებით.

³²და უფრო მოეწონება უფალს, ვიდრე ხარი, მოზვერი რქიანი და ჩლიქიანი.

³³ნახავენ მოკრძალებულნი, გაიხარებენ, და გაცოცხლდება გული თქვენი, მაძიებელნო ღმრთისა.

³⁴რადგან მოუსმენს ღატაკებს უფალი და თავის ტყვეებს არ უგულებელყოფს.

³⁵განადიდებენ მას ცა და დედამიწა, ზღვები და ყოველი მათში მოძრავი.

³⁶რადგანაც ღმერთი დაიხსნის სიონს და ააშენებს იუდას ქალაქებს, და დასახლდებიან იქ და დაიმკვიდრებენ.

³⁷მის მორჩილთა შთამომავლობა დაეუფლება მას, და მისი სახელის მოყვარულნი დაბინავდებიან მასში.