Read ბიბლია ფსალმ. 7 Bible Online

ფსალმ. 7 - ბიბლია bible

ფსალმ. 7

¹გალობა დავითისა, ბენიამინელი ქუშის სიტყვების გამო რომ უმღერა უფალს.

²უფალო, ღმერთო ჩემო! შენზე ვარ მონდობილი. მიხსენი ყველა მდევნელისაგან და გადამარჩინე.

³რათა არ დაგლიჯოს, ვითარცა ლომმა, სული ჩემი, დალეწოს და არ იყოს მხსნელი.

⁴უფალო, ღმერთო ჩემო! თუ რამ გავაკეთე, თუ უსამართლობა გამოვიდა ჩემი ხელიდან,

⁵თუ ჩემთვის მშვიდობის მსურველს ბოროტებით გადავუხადე და გავაგდე თუნდაც

⁶დაე, დევნოს მტერმა სული ჩემი და წამოეწიოს, დაე, დედამიწაზე დაანარცხოს სიცოცხლე ჩემი, და მტვრად აქციოს ღირსება ჩემი.

⁷აღსდექ, უფალო, შენი რისხვით, ამაღლდი გულისწყრომით ჩემს მტრებზე, გამოიღვიძე ჩემთვის სამართალზე, რომელიც შენ დადე მცნებად.

⁸გარს შემოგეხვევა გუნდი ხალხთა, მის ზემოთ ამაღლდი მწვერვალზე.

⁹უფალი განსჯის ერებს. განმიკითხე, უფალო, ჩემი სიმართლით და უბიწოებით, რომელიც ჩემშია.

¹⁰შეწყდეს ბოროტება ბიწიერთა, ხოლო მართალი გაამართლე, რადგან შენა ხარ გულისა და ზრახვების შემმოწმებელი, ღმერთო მართალო!

¹¹ჩემი ფარი უპყრია ღმერთს, გულმართალთა მხსნელს.

¹²ღმერთი მართალი მსაჯულია და ღმერთი —

¹³მახვილს გალესავს — თუ არ მორჯულდა, მშვილდს მოზიდავს და დაუმიზნებს.

¹⁴მომაკვლინებელი იარაღი გაამზადა მისთვის, ისრებს წარმართავს მდევნელთა მიმართ.

¹⁵აჰა, ჩაესახება სიმრუდე, დაორსულდება უკუღმართობით და შობს სიცრუეს.

¹⁶ორმო თხარა და ღრმად ამოკვეთა, სხვისთვის გაამზადა ორმო და თვითონ ჩავარდა.

¹⁷მისი ავგულობა მის თავზე დატრიალდება და მისი ბოროტება — მის თხემზე დაეცემა.

¹⁸ვადიდებ უფალს მისი სიმართლით და ვუგალობებ უზენაესი უფლის სახელს.