Read ბიბლია ფსალმ. 72 Bible Online

ფსალმ. 72 - ბიბლია bible

ფსალმ. 72

¹ფსალმუნი ასაფისა. რა კეთილია ღმერთი ისრაელის მიმართ, გულწრფელთა მიმართ.

²მე კი — კინაღამ გადაუხვიეს ჩემმა ფეხებმა, კინაღამ მომიცურდა ნაბიჯები!

³რადგან შემშურდა სულელებისა, როცა ვხედავდი ბოროტთა კეთილდღეობას.

⁴რადგან არა აქვთ შეჭირვება სიკვდილამდე, და გამტკიცებულია მათი გვამი.

⁵არ იტანჯებიან სხვა კაცთა მსგავსად და სხვა ადამიანებივით არ ტვირთმძიმობენ.

⁶ამიტომ მძივივით გარს შემოერტყა მათ ამპარტავნება და ძალადობა სამოსელივით შეიმოსეს.

⁷სიმსუქნისაგან თვალები გადმოკარკლეს, გულები აევსოთ სიბრიყვით.

⁸ლაპარაკობენ დამცინავად და ბოროტად, ძალადობით იმუქრებიან

⁹მათი პირი ცას მისწვდა და მათი ენა დედამიწაზე დაიარება.

¹⁰ამიტომ ბრუნდება მისი ერი აქ, და სვამენ წყალს სავსე თასიდან.

¹¹და ამბობენ: „როგორ შეიტყობს ღმერთი? განა აქვს გაგება უზენაესს?“

¹²აჰა, ესენი არიან ბოროტნი, და უზრუნველნი ამა სოფლისა,

¹³ამაოდ გავისუფთავე გული და დავიბანე სიწმიდით ხელები.

¹⁴და ვიყავი ნაგვემი ყოველდღე, და ვიტანჯებოდი დილდილობით.

¹⁵რომ მეთქვა: „ვიმსჯელებ ასე,“ მაშინ შენი შვილების თაობას ვუღალატებდი.

¹⁶და ვიფიქრე, რომ შემეგნო ეს — მაგრამ ძნელი იყო ჩემს თვალში.

¹⁷ვიდრე მოვიდოდი ღვთის ტაძარში და გავიგებდი მათ ბოლოს.

¹⁸მაგრამ მოლიპულ გზაზე დააყენე ისინი და უფსკრულში გადაჩეხე.

¹⁹როგორ მეყსეულად განადგურდნენ, დაიღუპნენ, გაქრნენ შიშის ზარისაგან!

²⁰როგორც სიზმარი ქარწყლდება გამოღვიძების შემდეგ, უფალო, ისე დაამცირებ მათ სახეებს, როცა გამოაფხიზლებ.

²¹როცა გული დამიძმარდა და შიგანი დამეფლითა,

²²უმეცარი ვიყავი და ვერ მივხვდი, პირუტყვივით ვიყავი შენს წინაშე.

²³ხოლო მე მუდამ შენთან ვარ, ხელთ გიპყრია მარჯვენა ჩემი.

²⁴შენი რჩევით მიმიძღვი წინ, და შემდგომ პატივით მიმიღებ.

²⁵ვინ არის ჩემთვის ცაში? და შენს გარდა არავინ მსურს დედამიწაზე.

²⁶ქანცგამოლეულია ჩემი სხეული და გული; ღმერთია ჩემი გულის სიმაგრე და ჩემი ხვედრი უკუნისამდე.

²⁷რადგან აჰა, შენგან განშორებულნი იღუპებიან; შენ მოსპობ ყველას, ვინც გაგიორგულდება.

²⁸ხოლო ჩემთვის სასიკეთოა ღმერთთან მიახლოება; უფალ ღმერთზე ვამყარებ იმედს, რათა ვილაპარაკო ყველა შენს საქმეზე.