Read ბიბლია ფსალმ. 76 Bible Online

ფსალმ. 76 - ბიბლია bible

ფსალმ. 76

¹გუნდის ლოტბარს. იედუთუნისთვის. ასაფის ფსალმუნი.

²ჩემი ხმა ღმერთის მიმართ და მე შევღაღადებ; ჩემი ხმა ღმერთის მიმართ და ის მომისმენს.

³ჩემი გაჭირვების დღეს უფალს ვეძებ; ჩემი ხელი ღამღამობით გაწვდილია და არ ივანებს, უარს ამბობს ნუგეშისცემაზე ჩემი სული.

⁴გავიხსენებ ღმერთს და ვკვნესი, ვისაუბრებ და უძლურდება ჩემი სული.

⁵თვალი არ დამახუჭინე, შევძრწუნდი და ვეღარ ვლაპარაკობ.

⁶ვიგონებ ადრინდელ დღეებს, გარდასულ წლებს;

⁷გავიხსენებ ჩემს გალობას ღამღამობით, ჩემს გულთან ვისაუბრებ და განიცდის სული ჩემი:

⁸„ნუთუ საუკუნოდ მიმატოვებს უფალი და აღარასოდეს მომისურვებს?

⁹ნუთუ სამუდამოდ გაქრა მისი წყალობა, დამთავრდა მისი სიტყვა თაობიდან თაობამდე?

¹⁰ნუთუ დაივიწყა შებრალება ღმერთმა? ნუთუ რისხვით უარყო სიბრალული?“

¹¹და ვთქვი: „აი, ჩემი უბედურება — შეცვლა უზენაესის მარჯვენისა.“

¹²გავიხსენებ უფლის საქმეებს, რადგანაც მახსოვს შენი ძველი სასწაულები.

¹³ჩავუკვირდები ყველა შენს ნამოქმედარს და შენს საქმეებზე ვისაუბრებ.

¹⁴ღმერთო, წმიდაა შენი გზა! რომელი ღმერთია შენსავით დიდი?

¹⁵შენა ხარ ღმერთი სასწაულის მოქმედი; შენ გამოავლინე ერებზე ძლიერება შენი.

¹⁶შენი მკლავით დაიხსენი შენი ერი — ძენი იაკობისა და იოსებისა.

¹⁷როდესაც გიხილეს წყლებმა, ღმერთო, როდესაც გიხილეს წყლებმა, ახმაურ ზღვათა უფსკრულებიც კი შეძრწუნდნენ.

¹⁸გადმოღვარეს წყლები ღრუბლებმა, ხმა მოსცეს ცათა, შენი ისრებიც გაფრინდნენ.

¹⁹შენი გრგვინივის ხმა ცის თაღზე — გაანათეს ელვებმა სამყარო, შეძრწუნდა და შეირყა დედამიწა.

²⁰ზღვაშია შენი გზა და შენი ბილიკი — დიდ მდინარეებში, და შენი კვალი არ არის ცნობილი.

²¹უძღოდი, ვითარცა ფარას, შენს ხალხს მოსეს და აარონის ხელით.