Read ბიბლია ფსალმ. 82 Bible Online

ფსალმ. 82 - ბიბლია bible

ფსალმ. 82

¹გალობა. ფსალმუნი ასაფისა.

²ღმერთო, ნუ დადუმდები, ყურს ნუ მოიყრუებ და ნუ დამშვიდდები!

³რადგან აჰა, შენი მტრები ხმაურობენ, და შენმა მოძულეებმა თავი წამოყვეს.

⁴შენი ერის საწინააღმდეგოდ მზაკვრობენ საიდუმლოდ და თათბირობენ მათზე, ვისაც შენ იფარავ.

⁵თქვეს: „მოდით, ამოვძირკვოთ ისინი, როგორც ერი და აღარ იხსენიებოდეს სახელი ისრაელისა.“

⁶მოითათბირეს ერთსულოვნად, შენს წინააღმდეგ შეკრეს პირობა;

⁷ედომელთა ბანაკებმა და ისმაელიანებმა, მოაბმა და აგარის ნაშიერმა;

⁸გებალმა, ყამონმა და ყამალეკმა, ფილისტინელებმა ცორელებთან ერთად.

⁹აშურიც მათ დაუმეგობრდა, და შეიქნენ სახსარნი ლოტის ძეთათვის.

¹⁰დამართე მათ ისევე, როგორც მიდიანს, როგორც სისერას, როგორც იაბინს კიშონის ხევზე;

¹¹განადგურდნენ ისინი ყენ-დორში, სასუქად იქცნენ მინდვრისათვის.

¹²მოექეცი მათ, მათს დიდებულებს ისევე, როგორც ყორებს და როგორც ზებს, და როგორც ზებახს,

¹³რომ ამბობდნენ: „დავიმკვიდროთ ჩვენთვის სამკვიდრებელი ღვთისა.“

¹⁴ღმერთო ჩემო, ჰყავ ისინი ვითარცა ბზე, ვითარცა ნამჯა ქარში;

¹⁵ვითარცა ცეცხლი, დამწველი ტყისა, ვითარცა ალი, მთების მბუგავი;

¹⁶ისე დაედევნე მათ შენი რისხვით, და შენი ქარიშხლით შეაძრწუნე ისინი!

¹⁷აავსე მათი პირი სირცხვილით, რომ ეძებდნენ შენს სახელს, უფალო.

¹⁸შერცხვებიან და შეძრწუნდებიან სამარადჟამოდ, და სირცხვილნაჭამნი დაიღუპებიან.

¹⁹მიხვდებიან, რომ შენი სახელია უფალი, მხოლოდ შენა ხარ უზენაესი მთელ ქვეყნიერებაზე.