Read ბიბლია ფსალმ. 83 Bible Online

ფსალმ. 83 - ბიბლია bible

ფსალმ. 83

¹გუნდის ლოტბარს. გათითის ხმაზე. კორახის ძეთა. ფსალმუნი.

²რაოდენ სასურველია შენი სადგომები, უფალო ძალთა!

³ნატრობს და ელტვის კიდეც ჩემი სული უფლის ეზოებს; გული ჩემი და სხეული ჩემი უმღერიან ცოცხალ ღმერთს.

⁴ჩიტმაც კი ჰპოვა ბინა და მერცხალმა ბუდე თავისთვის, რომ ჩასხას თავისი ბარტყები შენს სამსხვერპლოებთან, უფალო ძალთა, მეუფევ ჩემო და ღმერთო ჩემო!

⁵ნეტარ არიან შენს სახლში მსხდომნი, რომლებიც მარადჟამს განგადიდებენ.

⁶ნეტარ არს კაცი, რომლის ძლიერებაც შენშია, რომელთაც გული შენი საწმიდარისკენ მოუწევთ.

⁷გლოვის ველზე გამვლელნი წყაროს აღმოაჩენენ, და კურთხევით დაფარავს მათ ადრეული წვიმები შემოდგომისა.

⁸ივლიან ძალით-ძალამდე, გამოცხადდებიან ღმერთთან სიონში.

⁹უფალო, ღმერთო ძალთა, ისმინე ჩემი ლოცვა, ყური მომაპყარ, ღმერთო იაკობისა.

¹⁰ჩვენო ფარო, დაინახე, ღმერთო, და შეხედე სახეში შენს ცხებულს!

¹¹რადგან ერთი დღე შენს ეზოებში ათასჯერ უმჯობესია; ჩემი ღმერთის სახლის ზღურბლთან დგომას ვარჩევ ბოროტების კარვებში ბინადრობას.

¹²რადგან მზე და ფარია უფალი ღმერთი. მადლსა და ღირსებას მისცემს უფალი, სიკეთეს არ დაუჭერს უბიწოდ მოარულთ.

¹³უფალო ძალთა! ნეტარია კაცი შენზე მონდობილი.