Read ბიბლია ფსალმ. 87 Bible Online

ფსალმ. 87 - ბიბლია bible

ფსალმ. 87

¹გალობა. ფსალმუნი კორახის ძეთა. გუნდის ლოტბარს. მახალათის ხმაზე საგალობლად. მოძღვრება ჰემან ეზრახელისა.

²უფალო, ღმერთო ჩემო მხსნელო, შენს წინაშე ვღაღადებ დღედაღამ!

³მოვიდეს შენს წინაშე ჩემი ლოცვა, ყური მოაპყარ ვედრებას ჩემსას;

⁴რამეთუ აღივსო ვნებებით სული ჩემი და ჩემი სიცოცხლე ჯოჯოხეთს უახლოვდება.

⁵შევირაცხე მათ გვერდით. სამარეში რომ ჩადიან, შევიქენი, ვითარცა კაცი უძალღონო.

⁶მკვდრებს შორის ვარ ჩაგდებული, სამარეში მწოლარენი, და რომელნიც შენი ხელით მოისრნენ.

⁷მომათავსე ქვესკნელის ორმოში, ბნელეთში, მორევში.

⁸მე დამატყდა თავს რისხვა შენი, და ყველა შენი ტალღით დამტანჯე.

⁹შენ განმაშორე ნაცნობნი ჩემნი, საზიზღარი გამხადე მათთვის; დატყვევებული ვარ და ვერ გამოვდივარ.

¹⁰თვალი ჩემი დანაღვლიანდა ტანჯვით; მოგიხმობდი, უფალო, ყოველდღე, შენსკენ ვიწვდიდი ხელებს.

¹¹ნუთუ მკვდრებისათვის მოიმოქმედებ სასწაულს, ან მიცვალებულნი წამოდგებიან და განგადიდებენ?

¹²განა საფლავში ილაპარაკებენ შენს წყალობაზე, და ჯოჯოხეთში — შენს ჭეშმარიტებაზე?

¹³შეიცნობენ წყვდიადში შენს სასწაულებს და შენს სიმართლეს — დავიწყების ქვეყანაში?

¹⁴მე კი, უფალო, შენ გევედრებოდი, და დილ-დილობით ჩემი ლოცვა წინ გეგებებოდა.

¹⁵რად მიატოვე, უფალო, სული ჩემი, უკუიქციე პირისახე ჩემგან?

¹⁶ღარიბი ვარ და ტანჯული ყრმობიდანვე, შენს საშინელებებს ვზიდავ, დავუძლურდი.

¹⁷თავზე გადამიარა შენმა რისხვის სასჯელმა, შენმა შიშის ზარმა გამანადგურა.

¹⁸გარე მივლიდნენ, წყლების მსგავსად მთელ დღეს, ყველა ერთად მერტყმოდა გარს.

¹⁹შენ განმაშორე მოყვარე და მეგობარი, ჩემი ნაცნობნი ბნელით მოცულან.