Read ბიბლია ფსალმ. 89 Bible Online

ფსალმ. 89 - ბიბლია bible

ფსალმ. 89

¹ლოცვა მოსესი, ღვთისკაცისა. უფალო! თავშესაფარი იყავ ჩვენთვის თაობიდან თაობამდე.

²ვიდრე მთები დაიბადებოდნენ და შექმნიდი დედამიწასა და სამყაროს, და უკუნითი უკუნისამდე შენა ხარ ღმერთი.

³კაცს დააბრუნებ ხრწნადობისათვის და ეტყვი: „დაბრუნდით, ძენო კაცთანო!“

⁴რადგან ათასი წელი შენს თვალში, ვითარცა გუშინდელი დღე, რომ გადაიარა, და ერთი გუშაგობა ღამისა.

⁵ღვართქაფივით გააქანებ მათ, ძალი მათი დილდილობით ბალახივით შეიცვლება:

⁶დილას ყვავის და ფერს იცვლის, საღამოს ჭკნება და ხმება.

⁷რადგანაც დავილიეთ შენი რისხვით და შენი გულისწყრომით შევძრწუნდით.

⁸ჩვენი დანაშაულებანი წინ დაიდე, ჩვენი საიდუმლო — შენი სახის შუქის წინ.

⁹რადგან ყველა ჩვენი დღე გაილია შენი რისხვით, ისე მიდის ჩვენი წლები, როგორც ერთი ამოსუნთქვა.

¹⁰ჩვენს წელთა რიცხვი სამოცდაათი წელიწადია, ხოლო ჯანმაგრობის დროს — ოთხმოცი წელიწადი; და ამათგან უმეტესი ჯაფისა და არარაობისა, რადგან სწრაფად მიჰქრიან და ჩვენც იქით მივფრინავთ.

¹¹ვინ იცის შენი რისხვის ძალა, და შენი მძვინვარება შიშის შიშისამებრ?

¹²ჩვენი დღეების დათვლა გვასწავლე, რათა შევიძინოთ ბრძენი გული.

¹³მობრუნდი, უფალო, — ვიდრემდე მიგვატოვებ? — და ნუგეში ეცი შენს მორჩილებს.

¹⁴გაგვაძღე გარიჟრაჟზე შენი წყალობით, და ვიხაროთ და ვილხინოთ ყოველთა დღეთა ჩვენთა.

¹⁵გაგვამხიარულე იმ დღეთა წილ, რომ გვტანჯავდი, იმ წელთა წილ, გაჭირვება რომ ვნახეთ.

¹⁶იხილონ შენმა მორჩილებმა შენი საქმენი და შენი ბრწყინვალება — მათმა შვილებმა.

¹⁷და იყოს კეთილმოსურნეობა უფლისა, და საქმე ჩვენი ხელისა წარმართე ჩვენთვის, და საქმე ჩვენი ხელისა წარმართე.