Read ბიბლია ფსალმ. 91 Bible Online

ფსალმ. 91 - ბიბლია bible

ფსალმ. 91

¹ფსალმუნი. გალობა შაბათის დღისათვის.

²კარგია, ვადიდოთ უფალი, და ვუგალობოთ შენს სახელს, უზენაესო!

³გაუწყოთ დილ-დილობით შენი წყალობა და ჭეშმარიტება შენი — ღამ-ღამობით.

⁴ათსიმიანსა და ჩანგზე გალობით — ქნარზე.

⁵რაკი გამამხიარულე, უფალო, შენი ნამოქმედარით, შენთა ხელთა ნასაქმარს ვუგალობებ.

⁶რაოდენ დიდია შენი საქმეები, უფალო, ფრიად ღრმაა შენი ზრახვები.

⁷უგუნური კაცი ვერ შეიცნობს და უმეცარი ვერ გაიგებს ამას,

⁸როცა ბოროტნი აყვავდებიან ბალახივით და აღორძინდება ყველა — მოქმედი სიმრუდისა, რომ დაიღუპონ საუკუნოდ.

⁹ხოლო შენ მაღალი ხარ მარადჟამს, უფალო!

¹⁰რადგანაც, აგერ, შენი მტრები, უფალო, რადგანაც აგერ შენი მტრები იღუპებიან, განიბნევიან ყველანი — სიმრუდის მოქმედნი.

¹¹მოამაღლებ რქას ჩემსას მარტორქის რქისამებრ, ცხებული ვარ ხასხასა ზეთით.

¹²უჭვრეტს ჩემი თვალი ჩემს მტრებს, ჩემს წინააღმდეგ აღმდგარ ბოროტმოქმედებზე გაიგონებენ ჩემი ყურები.

¹³წმიდანი ფინიკივით გაიფურჩქნება, ლიბანის კედარივით წამოიმართება.

¹⁴უფლის სახლში დარგულნი, ჩვენი ღმერთის ეზოებში აყვავდებიან;

¹⁵სიბერეშიც გამოიღებენ ნაყოფს წვნიანსა და ხასხასას.

¹⁶რათა განვაცხადო: „მართალია უფალი; იგია ჩემი საყრდენი, და არ არის მასში უსამართლობა.“