Read ბიბლია ფსალმ. 95 Bible Online

ფსალმ. 95 - ბიბლია bible

ფსალმ. 95

¹უგალობეთ უფალს გალობა ახალი, უგალობეთ უფალს, მთელო ქვეყნიერებავ!

²უგალობეთ უფალს, ადიდეთ მისი სახელი, ახარეთ დღითი დღე ხსნა მის მიერი.

³მოუთხრეთ წარმართებს მისი ღირსება, ყოველ ერს — მისი სასწაულები.

⁴რადგან დიდია უფალი და ღირსსაქები მეტად, ყველა ღმერთებზე საშიშია ის,

⁵რადგან ერების ყველა ღმერთი კერპებია, ხოლო უფალმა შექმნა ცანი.

⁶მშვენება და ბრწყინვალებაა მის წინაშე, სიძლიერე და მომხიბლაობა — მის ტაძარში.

⁷შესწირეთ უფალს, ტომებო ხალხთა, შესწირეთ უფალს ქება და დიდება.

⁸შესწირეთ უფალს ქება მისი სახელისა. წაუღეთ ძღვენი და მიდით მის ეზოებში.

⁹თაყვანი ეცით უფალს მოწიწებით; ათრთოლდით მის წინაშე, მთელო ქვეყნიერებავ!

¹⁰უთხარით ხალხებს: „უფალი მეფობს!“ ამიტომ მტკიცეა სამყარო, არ შეირყევა. ის განიკითხავს ხალხებს სისწორით.

¹¹გამხიარულდებიან ცანი და მოილხენს ქვეყანა. იხმაურებს ზღვა და სავსება მისი.

¹²გაიხარებს ველი და ყოველი, რაც მასზეა, მაშინ იზეიმებენ ყოველნი ხენი ტევრისანი

¹³უფლის წინაშე, რადგან ის მოდის, რადგან ის მოდის ქვეყნიერების განსასჯელად; განსჯის სამყაროს სიმართლით და ერებს — თავისი ჭეშმარიტებით.