Read ბიბლია იგავ. 10 Bible Online

იგავ. 10 - ბიბლია bible

იგავ. 10

¹ბრძენი შვილი მამას ახარებს, ბრიყვი შვილი კი დედამისის დარდია.

²სარგებელი არ მოაქვს უკეთურ საგანძურს, მოწყალება კი სიკვდილისაგან იხსნის.

³უფალი არ დაამშევს მართლის სულს, უკეთურთა სიხარბეს კი ხელს ჰკრავს.

⁴გლახაკად აქცევს მოშვებული მაჯა, მუყაითთა ხელი კი ამდიდრებს.

⁵ზაფხულში მომკრეფი ჭკვიანია, მკის დროს მძინარე — სირცხვილის შვილი.

⁶კურთხევაა მართლის თავზე, უკეთურთა პირი კი ძალადობას ფარავს.

⁷მართლის ხსოვნა კურთხეულ იქნება, უკეთურთა სახელი კი დალპება.

⁸გულით ბრძენი მიიღებს მცნებებს, ხოლო ბაგით სულელი წაფორხილდება.

⁹სიმართლეში მოარული უშიშრად ივლის და თავისი გზის გამმრუდებელი გამომჟღავნდება.

¹⁰თვალის ჩამკვრელი მხოლოდ დარდს იწვევს, ბაგით სულელი კი წაფორხილდება.

¹¹სიცოცხლის წყაროა მართლის პირი, უკეთურთა პირი კი ძალადობას ფარავს.

¹²სიძულვილი განხეთქილებას აღვივებს, სიყვარული კი ყველა ცოდვას ფარავს.

¹³კეთილგონიერის ბაგეში სიბრძნე იპოვება, უგუნურის ზურგზე კი — წკეპლა.

¹⁴ბრძენნი ცოდნას აგროვებენ, სულელის პირი კი — მოახლოებულ განადგურებას.

¹⁵მდიდრის ქონება მისი ძლიერი ქალაქია, ღარიბთა განადგურება — მათი სიღატაკე.

¹⁶მართლის შრომა სიცოცხლისთვისაა, უკეთურის მოსავალი — ცოდვისათვის.

¹⁷დარიგების შემნახველი სიცოცხლის გზით დადის, შეგონების უკუმგდებელი კი გზას სცდება.

¹⁸ვინც სიძულვილს ფარავს, ცრუ ბაგეები აქვს, და ვინც ცილისმწამებლობს, ბრიყვია.

¹⁹ბევრი ლაპარაკით არ დაყოვნდება დანაშაული, ის კი, ვინც აკავებს თავის ბაგეებს, ჭკვიანია.

²⁰მართლის ენა რჩეული ვერცხლია, უკეთურთა გული კი — მწირი.

²¹მართლის ბაგენი მრავალს მწყემსავენ, სულელნი კი ჭკუანაკლულობით დაიხოცებიან.

²²უფლის კურთხევა ამდიდრებს და დარდი არ ემატება მას.

²³გართობასავით აქვს ბრიყვს ბოროტმოქმედება, ხოლო სიბრძნე — გონიერ კაცს.

²⁴რისაც ეშინია უკეთურს, ის მიეწევა მას, მართალთა წადილს კი სრულდება.

²⁵გადაივლის ქარიშხალი და აღარ არის უკეთური, მართალი კი საუკუნო საფუძველია.

²⁶ვით ძმარი კბილებისათვის და კვამლი თვალებისათვის, ისეა ზარმაცი მის წარმგზავნელთათვის.

²⁷უფლის შიში დღეებს უმატებს, უკეთურთა წლები კი მოკლდება.

²⁸მართალთა სასოება სიხარულია, უკეთურთა იმედი კი დაიღუპება.

²⁹უფლის გზა სიმაგრეა უბიწოსთვის, ავისმქნელთათვის კი — განადგურება.

³⁰მართალი საუკუნოდ არ წაბორძიკდება, უკეთურნი კი ვერ დაივანებენ ქვეყანაზე.

³¹მართლის პირი სიბრძნეს გამოისხამს, უკუღმართი ენა კი მოიკვეთება.

³²მართლის ბაგეებმა იციან, რა არის მოსაწონი, უკეთურთა პირმა კი — მხოლოდ უკუღმართობა.