Read ბიბლია იგავ. 11 Bible Online

იგავ. 11 - ბიბლია bible

იგავ. 11

¹მრუდი სასწორი სისაძაგლეა უფლის წინაშე, სრული წონა კი — მისი მოსაწონი.

²მოვა ამპარტავნობა და მოეწევა დამცირებაც, თავმდაბალთ კი სიბრძნე ახლავს.

³წრფელებს უბიწობა წარუძღვება, მოღალატეთ კი მათივე ცბიერება დაღუპავს.

⁴ქონება ვერ უშველის წყრომის დღეს, მოწყალება კი სიკვდილისაგან იხსნის.

⁵უბიწოს სამართლიანობა გაუსწორებს გზას, თავისი უკეთურობით კი ეცემა უკეთური.

⁶წრფელებს მათი სამართლიანობა იხსნის, მოღალატენი კი შეპყრობილი იქნებიან თავიანთი სიხარბით.

⁷უკეთური ადამიანის სიკვდილისას იკარგება მისი იმედი, და უსამართლოთა სასოება იკარგება.

⁸მართალი უბედურებას არიდებს თავს და მის ნაცვლად უკეთურს ეწევა.

⁹მლიქვნელი პირით ღუპავს თავის მოყვასს, მართალნი კი ცოდნით იხსნიან თავს.

¹⁰მართალთა სიკეთით ხარობს ქალაქი, უკეთურთა დაღუპვისას კი სიხარულის ყიჟინაა.

¹¹წრფელთა კურთხევით მაღლდება ქალაქი, უკეთურთა პირით კი ინგრევა.

¹²ვინც თვის მოყვასს აბუჩად იგდებს, ბრიყვია, გონიერი კაცი კი დუმს.

¹³ცილისმწამებელი საიდუმლოს ამჟღავნებს, სულით მტკიცე კი ფარავს საქმეს.

¹⁴ბრძნულ რჩევათა გარეშე ეცემა ერი, მრავალი მრჩეველი კი ხსნაა.

¹⁵თავის თავს ბოროტობს, ვინც უცხოს უდგება თავდებად, ხელის დარტყმის მოძულე კი უსაფრთხოდ არის.

¹⁶სანდომიანი ქალი პატივს იხვეჭს, მძლავრნი კი სიმდიდრეს იხვეჭენ.

¹⁷მოწყალე კაცი სიკეთეს უზღავს თავის სულს, სასტიკი კი თავის ხორცს აღიზიანებს.

¹⁸უკეთური იმსახურებს ფუჭ საქმეს, მოწყალების მთესველი კი — ჭეშმარიტ საზღაურს.

¹⁹სიმართლეში მტკიცე სიცოცხლისკენაა, ბოროტების მდევნელი კი — სიკვდილისკენ.

²⁰უფლის საძულველნი არიან გულმრუდნი, მისი სასურველნი კი — სწორი გზით მავალნი.

²¹ხელი ხელს ვერ გაექცევა და ბოროტი სასჯელს, მართალთა თესლი კი გადარჩება.

²²რაც ღორის დინგზე წამოცმული ოქროს ბეჭედია, ის არის ლამაზი და უჭკუო ქალი.

²³მართალთა წადილი მხოლოდ სიკეთეა, უკეთურთა მოლოდინი — რისხვა.

²⁴ზოგი ანიავებს მადლს და უფრო ემატება, ზოგი კი ზოგავს მოწყალებას — და აკლდება მას.

²⁵კურთხეულის სული დამსუყდება და, ვინც სხვას ასმევს წყალს, თვითონაც დარწყულებული იქნება.

²⁶ვინც თავისთან აკავებს ხორბალს, მას სწყევლის ერი, კურთხევა კი დამპურებლის თავზეა.

²⁷ვინც სიკეთისაკენ ილტვის, ის ეძებს მოწონებას, ბოროტის მაძიებელს კი ბოროტება ეწევა.

²⁸ვინც თავის სიმდიდრეზეა დაიმედებული, დაეცემა, მართალნი კი რტოსავით აყვავდებიან.

²⁹თავისი სახლის გამჩანაგებელი ქარს დაიმკვიდრებს, სულელი კი — ბრძენის მონობას.

³⁰მართლის ნაყოფი სიცოცხლის ხეა და ბრძენი სულებს იზიდავს.

³¹მართალს ამ ქვეყნად მიეზღვება, მითუმეტეს — უკეთურს და ცოდვილს.