Read ბიბლია იგავ. 16 Bible Online

იგავ. 16 - ბიბლია bible

იგავ. 16

¹გულის მოწოდებანი ადამიანს ეკუთვნის, ენის პასუხი კი უფლისაგან არის.

²კაცის ყველა გზა სუფთაა მის თვალში, ხოლო უფალი სწონის სულებს.

³გაანდე უფალს შენი საქმენი და შენი ფიქრები აღსრულდება.

⁴უფალმა ყველაფერი თავისი და თვით უკეთურიც — უბედურების დღისათვის.

⁵ყველა გულზვიადი უფლისათვის საძაგელია — ხელს ხელზე დავარტყამ, რომ ვერ გაექცევა სასჯელს.

⁶წყალობითა და ჭეშმარიტებით გამოისყიდება ურჯულოება და უფლის შიშით განუდგები ბოროტს.

⁷თუ სასურველია უფლისათვის კაცის გზები მის მტრებსაც შეარიგებს მასთან.

⁸სჯობს მცირედი და სიმართლით — მრავალს, მოხვეჭილს უსამართლობით.

⁹ადამიანი ირჩევს თავის გზას და უფალი წარმართავს მის ნაბიჯს.

¹⁰განაჩენია მეფის ბაგეებზე, სამსჯავროზე არ შესცოდავს მისი პირი.

¹¹სასწორი და სწორი პინები აქვს უფალს, მისი საქმეა აბგის ყველა საწონი ქვა.

¹²სისაძაგლეა მეფეთათვის უკანონობის ქმნა, რადგან სიმართლით ფუძნდება ტახტი.

¹³სათნოა მეფეთათვის მართალი ბაგენი და წრფელად მოლაპარაკენი უყვარს მას.

¹⁴მეფის გულისწყრომა სიკვდილის ანგელოზია, ბრძენი კაცი კი გააყუჩებს მას.

¹⁵მეფის სახის ნათელში სიცოცხლეა, მისი წყალობა კი გაზაფხულის წვიმის ღრუბელივითაა.

¹⁶სიბრძნის შეძენა ოქროზე უკეთესია და ჭკუის შეძენა — ვერცხლზე უმჯობესი.

¹⁷წრფელთა გზა ბოროტისაგან განდგომაა, თავისი გზის დამცველი სიცოცხლეს ინახავს.

¹⁸სიამაყე წინ უძღვის დაღუპვას და დაცემას წინ უძღვის ქედმაღლობა.

¹⁹სჯობს თავმდაბლებთან სულით მორჩილება ამაყებთან ნადავლის განაწილებას.

²⁰თავისი საქმის მომფიქრებელი სიკეთეს ჰპოვებს და უფალზე დაიმედებული ნეტარია.

²¹გულით ბრძენი გონიერად იწოდება და ტკბილი ბაგენი ხელს უწყობენ სწავლას.

²²ჭკუა თვისი პატრონისათვის სიცოცხლის წყაროა, სულელთა დარიგება კი — სისულელე.

²³ბრძენის გული გონიერს ხდის მის ენას და მის ბაგეზე წარუმატებს სწავლებას.

²⁴სასიამოვნო ნათქვამი გოლეული თაფლივითაა, სულისათვის ტკბილია და ხორცისათვის კურნება.

²⁵არის გზა, რომელიც სწორი ჩანს კაცის წინაშე, მისი ბოლო კი სიკვდილის გზებია.

²⁶მშრომელი თავისთვის შრომობს, რადგან მისი პირი აიძულებს მას.

²⁷უგვანი კაცი ბოროტის ამომთხრელია და მის ბაგეებზე დამწველი ცეცხლივითაა.

²⁸უკუღმართი კაცი შუღლს ავრცელებს და ცილისმწამებელი მეგობრებს აშორებს.

²⁹მოძალადე კაცი თავის მოყვასს აცდუნებს და მიჰყავს უკეთურ გზაზე.

³⁰თვალს ხუჭავს უკუღმართობის მოსაფიქრებლად, პირს კუმავს — ბოროტებას სჩადის.

³¹დიდების გვირგვინი ჭაღარაა, სიმართლის გზაზე იპოვება იგი.

³²მომთმენი სჯობს მამაცს და ის, ვინც თავის სულზე ბატონობს — ქალაქის დამპყრობს.

³³კალთაში იყრება წილი, მაგრამ უფლისგანაა მთელი მისი სამართალი.