Read ბიბლია იგავ. 2 Bible Online

იგავ. 2 - ბიბლია bible

იგავ. 2

¹შვილო ჩემო, თუ მიიღებ ჩემს ნათქვამს და ჩემს მცნებებს შეინახავ,

²ყურადღებით მოუსმენ სიბრძნეს, შენს გულს მოუხრი გონიერებას,

³რადგან თუ გონებას მოუხმობ, საზრიანობას მისცემ შენს ხმას;

⁴თუ მოძებნი მას, როგორც ვერცხლს და მონახავ მას, როგორც საუნჯეს,

⁵მაშინ გაიგებ უფლის შიშსა და უფლის შეცნობას ჰპოვებ.

⁶რადგან უფალი იძლევა სიბრძნეს, მისგანაა ცოდნა და გონიერება.

⁷შეუნახავს მოსაზრებულობას პატიოსანთ, ის ფარია უბიწოდ მავალთათვის,

⁸რათა დაიცვას სამართლის გზები და წმიდათა ბილიკებს გაუფრთხილდეს.

⁹მაშინ გაიგებ სამართლიანობას და სამართალს და პატიოსნებას — სიკეთის ყველა ბილიკს.

¹⁰როდესაც შევა სიბრძნე შენს გულში და ცოდნა ეამება შენს სულს,

¹¹განსჯა შეგინახავს შენ და საზრიანობა დაგიცავს,

¹²რათა გიხსნას ბოროტი გზიდან, უკუღმართად მოუბარი კაცისაგან,

¹³მათგან, რომელნიც ტოვებენ სწორ გზებს, რათა იარონ ბნელი გზით,

¹⁴რომელნიც ხარობენ ბოროტის ქმნით, ილხენენ ბოროტი უკუღმართობით,

¹⁵რომელთა გზები მრუდეა და უკუღმართობენ თავიანთ ბილიკებზე.

¹⁶რომ გიხსნას უცხო ქალისაგან, უცხოტომელისაგან, რომლის ნათქვამიც ლაქარდიანია,

¹⁷რომელმაც დატოვა თავისი სიყმაწვილის მეგობარი და თავისი ღმერთის აღთქმა დაივიწყა,

¹⁸რადგან მის სახლს სიკვდილისაკენ მიჰყავს და მის ბილიკებს — მკვდრებისკენ.

¹⁹არც ერთი მასთან შემსვლელი უკან არ ბრუნდება და ვეღარ ჰპოვებენ სიცოცხლის გზებს.

²⁰რათა იარო კეთილთა გზით და მართლის ბილიკები შეინახო.

²¹რადგან წრფელნი ქვეყნად იცხოვრებენ და უბიწონი დარჩებიან მასში.

²²ბოროტნი კი ქვეყნიდან მოიკვეთებიან და მოღალატენი აღმოიფხვრებიან მისგან.