Read ბიბლია იგავ. 20 Bible Online

იგავ. 20 - ბიბლია bible

იგავ. 20

¹ღვინო მქირდავია, მაგარი სასმელი — ხმაურიანი, და არავინ, მათგან გატაცებული, არ დაბრძენდება.

²ლომის ბოკვერის ღრიალივითაა მეფის რისხვა, მისი განმარისხებელი თავის თავს სცოდავს.

³ჩხუბისგან თავშეკავება ადამიანის ღირსებაა, ყოველი სულელი კი ბობოქრობს.

⁴ზარმაცი არ ხნავს შემოდგომიდან, მკის დროს კი მოითხოვს და არ იქნება.

⁵ზრახვა კაცის გულში ღრმა წყალია, ხოლო გონიერი კაცი ამოხაპავს მას.

⁶ბევრი გაიძახის თავის სიკეთეს, მაგრამ ერთგულ კაცს ვინ იპოვნის?

⁷მართალი თავისი უბიწობით დადის, ნეტარ არიან მისი ძენი მის შემდეგ.

⁸მეფე, მჯდომი სამართლის ტახტზე, ფანტავს თვისი თვალებით ყოველივე ბოროტს.

⁹ვინ იტყვის: „მე გავასუფთავე ჩემი გული, მე განვიწმიდე ჩემი ცოდვებისაგან?“

¹⁰ორგვარი საწონი, ორგვარი საზომი — ერთიც და მეორეც ეჯავრება უფალს.

¹¹თვისი საქციელის მიხედვითაც იცნობა ყმაწვილი, თუ სუფთაა ან თუ სამართლიანია მისი საქმე.

¹²მსმენელი ყური და მხილველი თვალი — ერთიც და მეორეც უფალმა შექმნა.

¹³ნუ გეყვარება ძილი, რათა არ გაღატაკდე. გაახილე შენი თვალი — გაძღები პურით.

¹⁴არ ვარგა, არ ვარგა ამბობს მყიდველი. ხოლო როდესაც წავა, ტრაბახობს.

¹⁵არის ოქრო და მრავალი მარგალიტი, ხოლო ცოდნის ბაგენი ძვირფასი ნივთია.

¹⁶აიღე მისი ტანსაცმელი, რადგან უცხოს დაუდგა თავდებად, და უცხოტომელის წილად გამოართვა მას გირაო.

¹⁷საამურია კაცისათვის სიცრუის პური, მერე კი ღორღით გაივსება მისი პირი.

¹⁸განზრახვანი რჩევით მტკიცდება, მაგრამ გონიერებით წარმართე ომი.

¹⁹საიდუმლოს გამამხელელი ცილისმწამებელია და პირმორღვეულებში ნუ გაერევი.

²⁰მამისა და დედის მაწყევარს სანთელი ჩაუქრება უკუნეთ წყვდიადში.

²¹დასაწყისში სწრაფად შეძენილი სამკვიდრო კურთხეული არ იქნება საბოლოოდ.

²²ნუ იტყვი: „მივაგებ ბოროტის წილ“ — ენდე უფალს და ის გიხსნის შენ.

²³ორგვარი საწონი საძულველია უფლისათვის და მრუდი სასწორი არ არის კარგი.

²⁴უფლისაგანაა მამაკაცის ნაბიჯები, ადამიანი კი როგორ გაიგებს თავის გზას?

²⁵მახეა ადამიანისათვის წმიდაზე ლაყბობა, ხოლო აღთქმათა შემდეგ — განსჯა.

²⁶გაფანტავს უკეთურთ ბრძენი მეფე და მათზე მოაქცევს ბორბალს.

²⁷უფლის სანთელია ადამიანის სული, მისი წიაღის იდუმალებათა გამომკვლეველი.

²⁸წყალობა და სიმართლე იცავენ მეფეს, და წყალობით უჭირავს თავისი ტახტი.

²⁹ჭაბუკთა დიდება მათი ძალაა, ხოლო მოხუცთა ბრწყინვალება — ჭაღარა.

³⁰ჭრილობანი კურნავენ ბოროტისაგან და ცემა გულს ასუფთავებს.