Read ბიბლია იგავ. 21 Bible Online

იგავ. 21 - ბიბლია bible

იგავ. 21

¹წყლის ნაკადია მეფის გული უფლის ხელში, სადაც მოისურვებს, იქ მიმართავს მას.

²კაცის ყველა გზა სწორია მის თვალში, ხოლო უფალი სწონის გულებს.

³სიმართლისა და სამართლის ქმნა მსხვერპლზე უკეთესია უფლისათვის.

⁴ამპარტავანი თვალი და ზვიადი გული, უკეთურთა სანთელი — ცოდვაა.

⁵ბეჯითის ზრახვანი მხოლოდ მატებისკენაა, ხოლო ყოველი დაუდევრისა — კლებისკენ.

⁶განძეულობის მოხვეჭა მატყუარა ენით სიკვდილის მძებნელთა წარმავალი ქროლვაა.

⁷უკეთურთა ძალადობა მათვე წაათრევს, რადგან მათ უარყვეს სამართლის ქმნა.

⁸დაკლაკნილია გარყვნილი კაცის გზა, ხოლო ვინც სუფთაა, წრფელია მისი მოქმედება.

⁹ბინის კუნჭულში ცხოვრება სჯობს ანჩხლ ქალთან საერთო სახლში ცხოვრებას.

¹⁰უკეთურის სული ბოროტს არის დახარბებული, წყალობას ვერ ჰპოვებს მის თვალში მისი მოყვასი.

¹¹თავქარიანის დასჯისას ბრიყვი ბრძენდება, ბრძენი კი შეგონებისას იძენს ცოდნას.

¹²მართალი თვალყურს ადევნებს უკეთურის სახლს, უბედურებას შეამთხვევს უკეთურთ.

¹³ვინც ყურს დაიცობს ღარიბის ძახილისაგან, ისიც მოუხმობს ერთ დღეს, მაგრამ არავინ გასცემს პასუხს.

¹⁴საჩუქარი, ფარულად მიძღვნილი, აცხრობს რისხვას და ქრთამი უბეში — ძლიერ გულისწყრომას.

¹⁵სიმართლის ქმნა სიხარულია მართლისათვის და შიშის ზარი — ბოროტმოქმედისთვის.

¹⁶გონების გზას აცდენილი ადამიანი მკვდართა კრებულში დაისვენებს.

¹⁷მხიარულების მოყვარული უპოვარი იქნება, ღვინისა და ზეთის მოყვარული არ გამდიდრდება.

¹⁸მართლისთვის გამოსასყიდი უკეთურია და წრფელთა სანაცვლოა მოღალატე.

¹⁹სჯობს უდაბნოს ქვეყანაში ჯდომა ანჩხლ და ბრაზიან ქალთან ყოფნას.

²⁰სანატრელი საგანძური და ზეთი ბრძენის სავანეშია, ხოლო ბრიყვი ადამიანი შთანთქავს მათ.

²¹სიმართლისა და მოწყალების მდევნელი სიცოცხლეს, სიმართლეს და პატივს ჰპოვებს.

²²ძლიერთა ქალაქს აიღებს ბრძენი და დაანგრევს მის საიმედო სიმაგრეს.

²³ვინც ბაგეს და ენას იცავს, ის იცავს თავის სულს უბედურებისაგან.

²⁴ზვიადი, ამპარტავანი და თავქარიანია მისი სახელი, ვინც ამპარტავნობის მძვინვით იქცევა.

²⁵ზარმაცს თავისი სიხარბე მოკლავს, რადგან მისი ხელები უარს ამბობენ შრომაზე.

²⁶მთელ დღეს ის სიხარბით ხარბობს, ხოლო მართალი გაიღებს და არ ზოგავს.

²⁷უკეთურთა მსხვერპლი სისაძაგლეა, მით უმეტეს, თუ ცბიერებით სწირავს მას.

²⁸ცრუ მოწმე დაიღუპება და მომსმენი კაცი მუდამ ილაპარაკებს.

²⁹უკეთური კაცი ისასტიკებს სახეს, ხოლო წრფელმა იცის თავისი გზა.

³⁰არ არის სიბრძნე და არ არის გონება, არ არის რჩევა უფლის საპირისპიროდ.

³¹ცხენი გამზადებულია ბრძოლის დღისათვის, მაგრამ გამარჯვება უფლისგანაა.