Read ბიბლია იგავ. 23 Bible Online

იგავ. 23 - ბიბლია bible

იგავ. 23

¹თუ დაჯდები ბატონთან პურის საჭმელად, კარგად დააკვირდი, რა არის შენს წინაშე,

²და დაადე დანა შენს საყლაპავს, თუ მსუნაგი ხარ.

³ნუ მოისურვებ მის საჭმელებს, რადგან ის მატყუარა პურია.

⁴ნუ შეალევ ღონეს გამდიდრებას, შეეშვი ამაზე ფიქრს.

⁵მოავლებ მას თვალს და აღარ არის იგი, რადგან შეისხამს იგი ფრთებს არწივივით და ცაში აფრინდება.

⁶ნუ შეჭამ თვალბოროტის პურს და მის საჭმელებს ნუ ისურვებ,

⁷რადგან როგორც ის ფიქრობს თავის სულში, ისეთია იგი: „ჭამე და სვი“, გეტყვის, მისი გული კი შენთან არაა.

⁸შენს ლუკმას, რომელიც შეჭამე, ამოარწყევ და ამაოდ დახარჯავ თავაზიან სიტყვებს.

⁹ბრიყვის გასაგონად ნუ ილაპარაკებ, რადგან ის აბუჩად აიგდებს შენი სიტყვების გონივრულობას.

¹⁰ნუ გადასცდები ძველ საზღვარს და ობოლთა მინდვრებში ნუ შეხვალ,

¹¹რადგან მათი გამომსყიდველი ძლიერია, ის იდავებს მათ დავას შენთან.

¹²შენი გული მიაპყარ დარიგებას და შენი ყურები — ცოდნის ნათქვამს.

¹³ნუ მოერიდები ყმაწვილის დასჯას, რადგან თუ შოლტით სცემ მას, არ მოკვდება.

¹⁴შენ შოლტით სცემ მას, მის სულს კი შავეთისაგან იხსნი.

¹⁵ჩემო შვილო! თუ დაბრძენდება შენი გული, გაიხარებს ჩემი გულიც,

¹⁶და გამხიარულდება ჩემი ფილტვები, როდესაც შენი ბაგენი სწორს ილაპარაკებენ.

¹⁷ნუ შეშურდება შენს გულს ცოდვილებისა, არამედ უფლის შიშში იყოს მთელ დღეს,

¹⁸რადგან არის მომავალი და შენი იმედი არ მოისპობა.

¹⁹ისმინე, შვილო, და დაბრძენდი და მიმართე შენი გული სარწმუნო გზაზე.

²⁰ნუ იქნები ღვინის მსმელთა შორის, ხორცით გაუმაძღართა შორის,

²¹რადგან ლოთი და მსუნაგი გაღატაკდება და მძინარა ჩაიცვამს ძონძებს.

²²უსმინე შენს მამას, მან გშობა შენ და აბუჩად ნუ აიგდებ შენს დედას, როდესაც მოხუცდება იგი.

²³სიმართლე შეიძინე და სიბრძნეს, შეგონებასა და გონებას ნუ გაყიდი.

²⁴ლხენით ილხენს მართლის მამა და ბრძენის მშობელი იხარებს მისით.

²⁵გაიხარონ მამაშენმა და დედაშენმა და ილხინოს შენმა მშობელმა.

²⁶მე მომეცი, შვილო, შენი გული და შენმა თვალებმა დაიცვან ჩემი გზა.

²⁷რადგან ღრმა ორმოა მეძავი და ვიწრო ჭა — უცხოტომელი ქალი.

²⁸ის ყაჩაღივით გისაფრდება და მოღალატეებს ამრავლებს ადამიანებში.

²⁹ვის „ვაი“ და ვის „უი“? ვის შუღლი? ვის საჩივარი? ვის ამაო ჭრილობები? ვის თვალების სიწითლე?

³⁰ღვინოზე გვიანობამდე დამხანებელთ, განზავებული ღვინის საჭაშნიკოდ მავალთ.

³¹ნუ უყურებ ღვინოს, რომ წითელია, თასს რომ აძლევს თავის ფერს, პირდაპირ რომ გადადის ყელში.

³²შემდეგ კი, გველივით გიკბენს და ასპიტივით გიჩხვლეტს.

³³შენი თვალები უცხო ხილვებს იხილავენ და შენი გული უკუღმართობას ილაპარაკებს.

³⁴იქნები ზღვის გულში მწოლარესავით, ან ანძის წვერზე.

³⁵„მცემენ — არ მეტკინება! მირტყამენ — ვერ ვიგრძნობ! როდის გავიღვიძებ? — ისევ მას დავუწყებ ძებნას.“