Read ბიბლია იგავ. 24 Bible Online

იგავ. 24 - ბიბლია bible

იგავ. 24

¹ნუ შეგშურდება ბოროტი კაცისა და ნუ ისურვებ მათთან ყოფნას,

²რადგან ძარცვაზე ფიქრობს მათი გული, სიბოროტით ლაპარაკობენ მათი ბაგენი.

³სიბრძნით აშენდება სახლი და გონებით განმტკიცდება,

⁴და ცოდნით ოთახები გაივსება, ყოველი ძვირფასი და საამური ქონებით.

⁵ბრძენი მამაკაცი ძლიერია და მცოდნე კაცი იმტკიცებს ძალას.

⁶რადგან გონივრულად წარმართავ შენს ომს და მრავალ მრჩეველშია ხსნა.

⁷სულელისათვის სიბრძნე ძნელად მისაწვდომია, კარიბჭესთან არ გახსნის თავის ბაგეს.

⁸ვინც ბოროტის ქმნას ფიქრობს, მას ბოროტგანმზრახველს უწოდებენ.

⁹სულელის განზრახვა ცოდვაა, ხოლო თავქარიანი საძულველია ადამიანისათვის.

¹⁰დაიღლები გასაჭირის დღეს, მცირეა შენი ძალა.

¹¹დაიფარე სასიკვდილოდ წარგზავნილნი და ნუთუ მიატოვებ დასახოცად განწირულთ?

¹²თუ იტყვი: „აბა, ჩვენ არ ვიცოდით ეს“ — განა გულთამხილავი ვერ გაიგებს? შენი სულის მფარველმა ხომ იცის და ის მიუზღავს ადამიანს მისი საქმისამებრ.

¹³ჭამე, შვილო, თაფლი, რადგან კარგია იგი, და გოლეული ეტკბობა შენს სასას.

¹⁴ასეთია სიბრძნის შეცნობა შენი სულისათვის, თუ ჰპოვე იგი, ყოფილა მომავალი და შენი იმედი არ მოისპობა.

¹⁵ნუ ჩაუსაფრდები, უკეთურო, მართლის სავანეს, ნუ გაძარცვავ მის წამოსაწოლს,

¹⁶რადგან შვიდჯერ დაეცემა მართალი, მაგრამ ადგება, ხოლო უკეთურნი უბედურებაში წაბორძიკდებიან.

¹⁷შენი მტრის დაცემისას ნუ გაიხარებ და მისი წაბორძიკებისას ნუ ილხენს შენი გული,

¹⁸თორემ იხილავს უფალი და ცუდად გამოჩნდება მის თვალში და მოაქცევს მისგან თავის რისხვას.

¹⁹ნუ გაეჯიბრები ბოროტმოქმედთ და ნუ შეგშურდება უკეთურთა,

²⁰რადგან მომავალი არ ექნება ბოროტს, უკეთურთა სანთელი ჩაქრება.

²¹გეშინოდეს უფლისა, შვილო, და მეფისა, და მეამბოხეებში ნუ გაერევი,

²²რადგან უცაბედად მოვა მათი დაღუპვა და ორივეს ზიანს ვინ შეიცნობს?

²³ესენიც ბრძენთათვისაა: მიკერძოება სასამართლოზე არ არის კარგი.

²⁴ვინც უკეთურს ეუბნება: „შენ მართალი ხარ“, იმას ხალხები დასწყევლიან, იმას ერები შერისხავენ.

²⁵ხოლო მამხილებელთ სიამე ექნებათ და მათზე გადმოვა კეთილი კურთხევა.

²⁶ტუჩებზე კოცნის, ვინც პასუხობს სარწმუნო სიტყვებით.

²⁷შეასრულე შენი საქმე გარეთ და მოამზადე მინდორში იგი, შემდეგ კი ააშენე შენი სახლი.

²⁸ნუ იქნები უმიზეზო მოწმე შენი მოყვასისა და ნუ ცდუნდები შენი ბაგეებით.

²⁹ნუ იტყვი: „როგორც ის მომექცა, მეც ისე მოვექცევი მას, მივუზღავ კაცს თავისი საქმისამებრ“.

³⁰ზარმაცი კაცის მინდორთან გავიარე და უგუნური ადამიანის ვენახთან,

³¹და აჰა, სულმთლად ღვარძლად ამოსულიყო, მისი ზედაპირი ეკალ-ბარდებს დაეფარა და მისი ქვის ზღუდე დანგრეულიყო.

³²და ვიხილე, გულისყური მივაპყარ, დავინახე, დარიგება მივიღე:

³³„ცოტა ძილი, ცოტა თვლემა, ცოტა გულხელდაკრეფა დასაწოლად“.

³⁴და მოვა მგზავრივით შენი სიღატაკე და შენი სიღარიბე ფარიანი კაცივით.