Read ბიბლია იგავ. 3 Bible Online

იგავ. 3 - ბიბლია bible

იგავ. 3

¹შვილო ჩემო! ჩემს რჯულს ნუ დაივიწყებ, და ჩემი მცნებანი დაიცვას შენმა გულმა,

²რადგან დღეგრძელობას და ცხოვრების წლებს და მშვიდობას შეგმატებენ შენ.

³წყალობა და ჭეშმარიტება ნუ დაგტოვებს, შეიბი ისინი ყელზე, დაიწერე შენი გულის ფიცარზე.

⁴და მოიპოვებ მადლს და კეთილ გაგებას ღვთისა და ადამიანის თვალში.

⁵დაენდე უფალს მთელი შენი გულით და შენს გონებას ნუ დაეყრდნობი.

⁶ყველა შენს გზაზე შეიცანი იგი და ის გაასწორებს შენს ბილიკებს.

⁷ნუ იქნები ბრძენი შენს თვალში, გეშინოდეს უფლის და უკუიქეც ბოროტებისაგან.

⁸კურნება იქნება ეს შენი სხეულისთვის და გამაგრილებელი შენი ძვლებისა.

⁹პატივი მიაგე უფალს შენი ქონებიდან და მთელი შენი ჭირნახულის პირველნაყოფიდან,

¹⁰და გაივსება შენი ბეღლები მოსავლით და მაჭარი შენი საწნახელიდან გადმოვა.

¹¹უფლის დარიგებას, შვილო ჩემო, ნუ შეიზიზღებ და მისი შეგონება ნუ მოგძულდება.

¹²ვინც უყვარს უფალს, იმას დასჯის როგორც მამა — შვილს, თავის საქებარს!

¹³ნეტარია ადამიანი სიბრძნის მპოვნელი და ადამიანი — ჭკუის მომხვეჭელი!

¹⁴რადგან მისი საზღაური ვერცხლის საზღაურს სჯობს და მისი მოსავალი — წმიდა ოქროს.

¹⁵ის მარგალიტებზე ძვირფასია, და არანაირი შენი საწადელი არ შეედრება მას.

¹⁶დღეგრძელობა მის მარჯვენაშია, მის მარცხენაში — სიმდიდრე და პატივი.

¹⁷მისი გზები საამური გზებია და მისი ყველა ბილიკი მშვიდობაა.

¹⁸სიცოცხლის ხეა ის მათთვის, ვინც ეჭიდება მას, და მას მინდობილნი ნეტარნი არიან.

¹⁹უფალმა სიბრძნით დააფუძნა დედამიწა, გონებით განამტკიცა ცა.

²⁰თავისი ცოდნით ჯურღმულები გაიპო და ღრუბელნი ცვარს აფრქვევენ.

²¹შვილო ჩემო, ნუ მოშორდება შენს თვალებს — დაიცავი გონიერება და განსჯა.

²²და იქნება ისინი სიცოცხლე შენი სულისათვის და სამკაული შენი ყელისათვის.

²³მაშინ ივლი უსაფრთხოდ შენს გზაზე და შენი ფეხი არ დაბრკოლდება.

²⁴როცა დაწვები, არ შეგეშინდება და ტკბილი იქნება შენი ძილი.

²⁵ნუ შეგეშინდება უეცარი შიშისა და ბოროტეულის თავდასხმისა, როცა მოვა,

²⁶რადგან უფალი იქნება შენი საყრდენი და დაიცავს შენს ფეხს შებორკვისაგან.

²⁷ნუ დაუჭერ სიკეთეს მას, ვისაც ერგება, როდესაც შენს ხელს ძალუძს ამის გაკეთება.

²⁸ნუ ეტყვი მოყვასს: „წადი და ხვალ მოდი და მაშინ მოგცემ,“ თუ თანა გაქვს.

²⁹ნუ განიზრახავ შენი მოყვასისათვის ბოროტს, თუ ის დანდობილად ცხოვრობს შენთან.

³⁰ნუ ედავები ადამიანს უმიზეზოდ, თუ მას ბოროტით არ მოუზღავს შენთვის.

³¹ნუ შეგშურდება მოძალადესი და ნუ ამოირჩევ ნურც ერთს მის გზათაგან.

³²რადგან სისაძაგლეა უფლის წინაშე მრუდი, წრფელებთან კი მეგობრობს იგი.

³³უფლის წყევლაა ბიწიერის სახლზე, ხოლო მართალთა ბინას აკურთხებს იგი.

³⁴თუ მასხარებს ამასხარავებს, თავმდაბლებს აძლევს იგი მადლს.

³⁵ბრძენნი პატივს დაიმკვიდრებენ, ხოლო ბრიყვნი დამცირებას მიიღებენ.