Read ბიბლია იგავ. 30 Bible Online

იგავ. 30 - ბიბლია bible

იგავ. 30

¹სიტყვები აგურისა, იაკეს ძისა, მისნისა, წარმონათქვამი ითიელის, ითიელისა და უქალისადმი:

²მე ხომ უმეცარი ვარ კაცთაგან და ადამიანის გონება არა მაქვს მე,

³არ მისწავლია სიბრძნე და წმიდის შეცნობა არ ვიცი.

⁴ვინ ავიდა ცაში და ჩამოვიდა? ვინ შეაგროვა ქარი თავისი მუჭებით? ვინ გამოიკრა წყალი კვართში? ვინ დაადგინა მიწის ყოველი კიდე? რა არის მისი სახელი და რა არის მისი ძის სახელი, თუ იცი?

⁵ღმერთის ყოველი ნათქვამი ხალასია, ფარია ის მასზე დანდობილისათვის.

⁶ნურაფერს მიუმატებ მის სიტყვებს, რათა არ დაგსაჯოს და არ გამოდგე მატყუარა.

⁷ორს მოვითხოვ მე შენგან, უარს ნუ მეტყვი, სანამ მოვკვდები:

⁸ამაო და სიცრუე განმაშორე, ნურც სიღარიბეს და ნურც სიმდიდრეს ნუ მომცემ, ჩემი წილი პურით გამომკვებე,

⁹რომ არ გავძღე, არ უარვყო და არ ვთქვა: „ვინ არის უფალი?“ ან რომ გაღარიბებულმა, არ ვიქურდო და არ შევბღალო სახელი ჩემი ღმერთისა.

¹⁰ნუ დააბეზღებ მონას თავის ბატონთან, რათა არ დაგწყევლოს და არ დადანაშაულდე.

¹¹თაობა, მაწყევარი თავისი მამისა და არა მაკურთხებელი თავისი დედისა,

¹²თაობა, სუფთა საკუთარ თვალში, მაგრამ განუბანელი თავის სიბინძურისაგან,

¹³თაობა, რა ზვიადია მისი თვალები და რა აზიდულია მისი ქუთუთოები,

¹⁴თაობა, რომელთა კბილები მახვილებია და რომელთა ყბები დანებია, რათა შეჭამოს საწყალნი ქვეყნისა და უპოვარნი ადამიანთაგან.

¹⁵წურბელას ორი ასული ჰყავს: „მომეცი, მომეცი!“ სამი გაუმაძღარია და ოთხი არ იტყვის: „კმარა!“

¹⁶შავეთი და უნაყოფო საშო, ქვეყანა, რომელიც ვერ ძღება წყლით, და ცეცხლი, რომელიც არ ამბობს: „კმარა!“

¹⁷თვალი მამის დამცინავი და დედის მორჩილების მოძულე — ამოკორტნიან მას ხევის ყორნები და შეჭამენ მას არწივის მართვენი.

¹⁸სამი რამ არის საოცარი ჩემთვის, ხოლო ოთხი რამ არ ვიცი:

¹⁹გზა არწივისა ცაში, გზა გველისა კლდეზე, გზა ხომალდისა ზღვის შუაგულში და გზა მამაკაცისა ქალწულთან.

²⁰ასეთია გზა მრუში ქალისა: შეჭამა, მოიწმინდა პირი და თქვა: „არ გამიკეთებია მე ცუდი!“

²¹სამი რამის ქვეშ იძვრის მიწა და ოთხის ზიდვა არ შეუძლია:

²²მონა, როდესაც ის მეფდება, და არამზადა, როდესაც ის პურით ძღება,

²³საძულველი ქალი, როდესაც ის თხოვდება და მხევალი, როდესაც ის დაიმკვიდრებს თავისი ქალბატონის ადგილს.

²⁴ოთხი რამ არის უმცირესი მიწაზე, მაგრამ ისინი ბრძენზე ბრძენნი არიან:

²⁵ჭიანჭველები არ არიან ძლიერნი, მაგრამ ზაფხულში იმზადებენ თავიანთ პურს.

²⁶კურდღლები არ არიან მაგარი ხალხი, მაგრამ კლდეზე დგამენ თავიანთ სახლს.

²⁷მეფე არა ჰყავს კალიას, მაგრამ ყველანი მწყობრად გამოდიან.

²⁸ფსვენს ხელებით დაიჭერ, ის კი მეფის სასახლეებშია.

²⁹სამნი კარგად დააბიჯებენ და ოთხნი მარჯვედ დადიან:

³⁰ლომი ძლიერია მხეცებში და უკან არ დაიხევს არავის წინაშე,

³¹საბრძოლოდ აღკაზმული ცხოველი და ბოტი და მეფე, როდესაც ჯარი ახლავს!

³²შენ თუ იარამზადე ქედმაღლობით ან ბოროტი განიზრახე, დაიდე ხელი პირზე!

³³რადგან რძის შედღვება წარმოქმნის კარაქს და ცხვირის შედღვება წარმოქმნის სისხლს, ხოლო რისხვის შედღვება წარმოქმნის შუღლს!