Read ბიბლია იგავ. 4 Bible Online

იგავ. 4 - ბიბლია bible

იგავ. 4

¹ისმინეთ, შვილებო, მამის დარიგება, ყური დაუგდეთ სიბრძნის შესაცნობად.

²რადგან კარგი შეგონება მოგეცით თქვენ, ჩემს მოძღვრებას ნუ განაგდებთ.

³რადგან მეც შვილი ვიყავი მამაჩემისა, სათუთი და ერთადერთი — დედის წინაშე,

⁴ის მასწავლიდა და მეუბნებოდა: „დაიკავოს შენმა გულმა ჩემი სიტყვები, შეინახე ჩემი მცნებები და იცოცხლებ.

⁵შეიძინე სიბრძნე, შეიძინე გაგება, ნუ დაივიწყებ და ნუ გადაუხვევ ჩემს ნათქვამს.

⁶ნუ განაგდებ მას და ის შეგინახავს შენ, გიყვარდეს იგი და დაგიცავს შენ.

⁷სიბრძნის სათავეა სიბრძნის შეძენა, მთელი შენი შენაძენით გაგება შეიძინე.

⁸განადიდე იგი და აღგამაღლებს შენ, პატივს გცემს, თუ შემოეხვევი მას.

⁹ის დაგადგამს თავზე მშვენიერ გვირგვინს, დიდებულ ჯიღას მოგიძღვნის შენ.“

¹⁰ისმინე, შვილო ჩემო, და მიიღე ჩემი ნათქვამი და გაგიმრავლდება შენი სიცოცხლის წლები.

¹¹მე მიგითითე შენ სიბრძნის გზაზე, წაგიძეხი სწორ ბილიკზე.

¹²შენი სვლისას არ შევიწროვდება შენი ნაბიჯი და თუ გაიქცევი, არ წაბორძიკდები.

¹³ჩაეჭიდე დარიგებას, ნუ შეეშვები, დაიცავი, რადგან შენი სიცოცხლეა იგი.

¹⁴უკეთურთა კვალზე ნუ ივლი და ბოროტთა გზას ნუ დაადგები.

¹⁵მიატოვე იგი, ნუ გაივლი მასზე, გადაუხვიე მისგან და გაიარე.

¹⁶რადგან არ დაიძინებენ ისინი, სიბოროტე თუ არ ჩაიდინეს, და ძილი გაუკრთებათ, თუ არ დააბრკოლეს,

¹⁷რადგან უკეთურების პურს ჭამენ და ძალადობის ღვინოს სვამენ.

¹⁸მართალთა კვალი განთიადივითაა, რომელიც უფრო და უფრო ძლიერდება შუადღემდე.

¹⁹უკეთურთა გზა წყვდიადივითაა, არ იციან, რაზე წაიბორძიკებენ.

²⁰შვილო ჩემო, ჩემს სიტყვებს მოუსმინე, ჩემს ნათქვამს ყური მიაპყარი,

²¹არ მოშორდნენ ისინი შენს თვალებს, შეინახე შენი გულის წიაღში.

²²რადგან ისინი სიცოცხლეა მათი მპოვნელისათვის და კურნებაა მთელი მისი ხორცისათვის.

²³ყველაზე მეტად დაიცავი შენი გული, რადგან მისგან არის სიცოცხლის წყაროები.

²⁴მოიცილე მზაკვრობა და ბაგეთა სიბილწე.

²⁵შენმა თვალებმა პირდაპირ იცქირონ და შენი მზერა სწორად წარიმართოს შენს წინაშე.

²⁶გათელე სარბიელი შენი ფეხისა და ყოველი შენი გზა განმტკიცდება.

²⁷ნურც მარჯვნივ გადაუხვევ, ნურც მარცხნივ, განარიდე შენი ფეხი ბოროტებას.