Read ბიბლია იგავ. 5 Bible Online

იგავ. 5 - ბიბლია bible

იგავ. 5

¹შვილო ჩემო, ჩემს სიბრძნეს მოუსმინე და ყური მიაპყარ ჩემს გონიერებას,

²რათა შეინახო განსჯა და შენმა ბაგეებმა დაიცვან ცოდნა.

³რადგან გოლეულ თაფლს აწვეთებენ ბაგენი უცხო ქალისა და ზეთივით მოედინებიან სიტყვები მისი,

⁴მაგრამ მისი შედეგი მწარეა ნაღველივით და ბასრი, ვით ორლესული მახვილი.

⁵მისი ფეხები სიკვდილში ჩადიან, შავეთს არიან ჩაჭიდებულნი მისი ნაბიჯები,

⁶რომ ცხოვრების გზა არ გაიკაფოს, მისი გზა-კვალი არეულია, ვერ გაიგებ მას.

⁷ახლა კი, შვილებო, მომისმინეთ მე და ნუ უკუიქცევით ჩემი ნათქვამისაგან.

⁸მოაშორე მას შენი გზა და მისი სახლის ზღურბლს ნუ მიუახლოვდები,

⁹რათა არ მისცე სხვას შენი მშვენება და შენი წლები — დაუნდობელს,

¹⁰რათა არ გაძღნენ სხვანი შენი ძალით და შენი ნაშრომი არ წავიდეს უცხოთა სახლში.

¹¹და შენ აკვნესდები საბოლოოდ, შენი ხორცისა და შენი ტანის ჩამოხმობისას,

¹²და იტყვი: „როგორ შევიძულე დარიგება? შეგონება შეიძაგა ჩემმა სულმა,

¹³არ მოვუსმინე ჩემს მასწავლებელთა ხმას და ჩემს მოძღვართ არ მივაპყარ ჩემი ყური,

¹⁴კინაღამ გავნადგურდი სრულიად კრებულში და საზოგადოებაში.“

¹⁵სვი წყალი შენი ბინულიდან და ნაკადები შენი ჭიდან,

¹⁶იდინონ შენმა წყაროებმა ქუჩაში და წყლის ნაკადულებმა — მოედნებზე.

¹⁷მხოლოდ შენი იყოს ისინი და არა შენთან მყოფ უცხოთესლთა.

¹⁸კურთხეული იყოს შენი წყარო და გაიხარე შენი სიყრმის ცოლით,

¹⁹საყვარელი ფურ-ირმითა და მშვენიერი შველით. მისმა მკერდმა დაგაკმაყოფილოს ყოველ ჟამს, მისი სიყვარული გიტაცებდეს მუდამ!

²⁰რატომ გიტაცებს, შვილო ჩემო, უცხო ქალი და უცხოელის მკერდზე მოხვევა?

²¹რადგან უფლის თვალწინაა კაცის გზები და მის ყოველ სარბიელს ის თელავს.

²²საკუთარი ურჯულოებით იქნება უკეთური შეპყრობილი, და მისი ცოდვის ბორკილები დააკავებენ მას.

²³უშეგონებოდ მოკვდება იგი და თავისი უზომო სიბრიყვის წარიტაცება.