Read ბიბლია იგავ. 8 Bible Online

იგავ. 8 - ბიბლია bible

იგავ. 8

¹განა სიბრძნე არ ღაღადებს და გონიერება არ გამოსცემს თავის ხმას?

²სიმაღლეთა მწვერვალზე, გზაზე, გზაჯვარედინზე დგას იგი,

³კარიბჭეთა მახლობლად, ქალაქის წინ, კართა შესასვლელთან შემოსძახებს:

⁴„კაცებო, თქვენ გეძახით და ჩემი ხმა ადამის ძეთა მიმართ არის.

⁵ბრიყვნო, გაიგეთ სიბრძნე და რეგვენნო, შეაგნებინეთ გულს.

⁶ისმინეთ, რადგან მთავარს ვლაპარკობ, და გაღება ჩემი ბაგისა სიმართლეა.

⁷რადგან ჭეშმარიტებას წარმოთქვამს ჩემი პირი და უკეთურება სისაძაგლეა ჩემს ბაგეთათვის.

⁸სამართლიანია ყოველი ნათქვამი ჩემი პირისა, არაა მათში არაფერი დაკლაკნილი და მრუდე.

⁹ყოვლად ნათელია ისინი გონიერისთვის და სიმართლეა ცოდნის მპოვნელთათვის.

¹⁰მიიღეთ ჩემი დარიგება და არა ვერცხლი, და ცოდნა მეტად, ვიდრე რჩეული ოქრო.

¹¹რადგან სიბრძნე მარგალიტებზე უკეთესია და არავითარი საწადელი მას არ შეედრება.“

¹²მე, სიბრძნე, ვმკვიდრობ გონიერებასთან და განსჯის ცოდნას ვპოვებ.

¹³უფლის შიში ბოროტების სიძულვილია. სიამაყე და ქედმაღლობა და ბოროტი გზა, და უკუღმართი პირი მძულს მე.

¹⁴ჩემია რჩევა და გონიერება, მე ვარ გონება, ჩემია ძალა.

¹⁵ჩემით მეფობენ მეფენი და ხელისუფალნი სამართალს აწესებენ.

¹⁶ჩემით მთავრობენ მთავარნი და კეთილშობილნი, ქვეყნის ყოველი მოსამართლე.

¹⁷მე მიყვარს ჩემი მოყვარულნი და ჩემი მაძიებელნი მპოვებენ მე.

¹⁸სიმდიდრე და ღირსება ჩემთანაა, დიდძალი ქონება და სიმართლე.

¹⁹ჩემი ნაყოფი ბაჯაღლო ოქროზე უკეთესია და ჩემი მოსავალი — რჩეულ ვერცხლზე.

²⁰სიმართლის გზით დავდივარ მე, სამართლის ბილიკებით,

²¹რათა დავუმკვიდრო ჩემს მოყვარულთ არსებობა და მათი საგანძურები ავავსო.

²²უფალს ვყავდი მე თავისი გზის სათავეში, თავის ქმნილებებამდე, იმ ჟამითვე.

²³უკუნისიდან ვარ დაფუძნებული, თავიდანვე, მიწაზე უწინარეს.

²⁴უფსკრულთა არყოფნისას დავიბადე, წყაროთა წყლების სიუხვის არყოფნისას.

²⁵სანამ მთები დადგებოდნენ, ბორცვებზე ადრე დავიბადე.

²⁶როდესაც ჯერ კიდევ არ იყო შექმნილი მიწა და მინდვრები, სამყაროს დასაბამი მტვერი.

²⁷როცა ის ცას ამყარებდა, მეც იქ ვიყავი, როცა წრეს ჰკრავდა უფსკრულის ზედაპირზე,

²⁸როცა ღრუბლებს ამაგრებდა მაღლით, როცა ძლიერდებოდა უფსკრულთა წყაროები,

²⁹როცა დაადგინა ზღვისთვის საზღვარი, რათა წყლებს არ გადაელახათ მისი ნაპირი, როცა აწესებდა დედამიწის საფუძვლებს,

³⁰მე ვიყავი მის გვერდით აღმშენებლად და მის სიხარულად დღენიადაგ, მოხარული მის წინაშე ყოველ ჟამს,

³¹ვხარობდი მისი მიწის სამყაროში, და იყო ჩემი სიხარული ადამის ძეთა

³²და ახლა, შვილებო, მისმინეთ მე, რადგან ნეტარ არიან ჩემს გზათა დამცველნი.

³³ისმინეთ ჩემი დარიგება, დაბრძენდით და ნუ განდგებით.

³⁴ნეტარია კაცი, ვინც მომისმენს მე, ვინც ფხიზლობს ჩემს კარებთან დღენიადაგ, რომ დაიცვას ჩემი შესასვლელის წირთხლები.

³⁵რადგან ჩემმა მპოვნელმა სიცოცხლე ჰპოვა და წყალობა მიიღო უფლისაგან.

³⁶ხოლო ჩემი შემცოდე თავის სულს ავნებს, ყოველ ჩემს მოძულეს სიკვდილი უყვარს.