Read ბიბლია ქებ. 3 Bible Online

ქებ. 3 - ბიბლია bible

ქებ. 3

¹„ვეძებე ღამით ჩემს სარეცელზე ჩემი სულის შეყვარებული, ვეძებე იგი და ვერ ვიპოვე.

²ავდგები-მეთქი და მოვივლი ქუჩებსა და მოედნებს. მოვძებნი-მეთქი ჩემი სულის შეყვარებულს. ვეძებე იგი და ვერ ვიპოვე.

³შემომხვდნენ მცველნი, ქალაქის შემომვლელნი — ‘ხომ არ გინახავთ ჩემი სულის შეყვარებული?’

⁴ცოტას გავშორდი, ვიპოვე ჩემი სულის შეყვარებული. დავიჭირე და აღარ გავუშვი, ვიდრე არ შევიყვანე დედაჩემის სახლში და ჩემი მშობლის გალიაკში.“

⁵„გაფიცებთ თქვენ, ასულნო იერუსალიმისა, ველის ნიამორებს და ირმებს გაფიცებთ, არ გააღვიძოთ, არ აღძრათ სიყვარული, ვიდრემდის თავად არ ინებოს!“

⁶ვინ არის იგი, უდაბნოდან ამომავალი, ვით სვეტი კვამლისა, მურითა და გუნდრუკით კმეული და მენელსაცხებელთა ყოველი სურნელით?

⁷აჰა, სოლომონის სარეცელი: სამოცი ძლიერი მის გარშემოა, ძლიერთაგან ისრაელისა.

⁸თითოეულს მახვილი უპყრია, გაწვრთნილნი არიან საბრძოლველად, გვერდზე ჰკიდია თითოეულს მახვილი ღამეებში შიშით.

⁹ტახტრევანი გაიკეთა მეფე სოლომონმა ლიბანის ძელთაგან.

¹⁰სვეტები მისი ვერცხლისგან შექმნა, საიდაყვენი — ოქროსგან, საყდარი — მეწამული ქსოვილისგან, შიგნიდან სიყვარულით მოჰქარგეს იერუსალიმის ასულებმა.

¹¹გამოდით, ასულნო სიონისა, და იხილეთ მეფე სოლომონი რომლითაც დედამ დააგვირგვინა იგი მისი ქორწილისა და გულის სიხარულის დღეს.“