Read ბიბლია ქებ. 7 Bible Online

ქებ. 7 - ბიბლია bible

ქებ. 7

¹„მობრუნდი, მობრუნდი, სულამით, მობრუნდი, მობრუნდი, რომ გიცქერდეთ შენ!“ „რად უცქერდით სულამითს, როგორც მახანაიმის ფერხისაის?

²როგორ გამშვენდნენ შენი ფეხები შენს ხამლებში, ზეპურო ასულო! თეძოთა სიმრგვალე მანიაკს გიგავს, შექმნილს ხელოვანის ხელით.

³შენი ჭიპი მრგვალი თასია, ღვინისგან მოუკლებელი; შენი მუცელი ხორბლის ხვავია, შროშანთაგან გარემოცული.

⁴ორი ძუძუ შენი ორი თიკანია, მაჩბივნი ნიამორისა.

⁵შენი ყელი სპილოსძვლის გოდოლია; შენი თვალები ხეშბონის ტბორებია ბათ-რაბიმის კარიბჭესთან; შენი ცხვირი ლიბანის გოდოლია, დამასკოს მიმართ მიქცეული.

⁶შენი თავი შენს ტანზე ქარმელის მთაა და ნათხზენი შენს თავზე სამეფო ძოწეული, კავებით შეკრული.

⁷რა მშვენიერი ხარ, საყვარელო, შენი სიტკბოებით!

⁸შენი ტანი ფინიკის ხეა, შენი ძუძუნი — ვაზის მტევნები.

⁹ვთქვი: ‘ავალ ფინიკზე და მის რტოებს მოვეჭიდები;’ შენი ძუძუნი იქნებოდნენ ვით ვაზის მტევნები და შენი ნესტოების სურნელი — ვით ვაშლის სურნელი.

¹⁰შენი სასა ღვინოა კეთილი, ჩემი საყვარლისაკენ მიღვარული, მძინარეთა ბაგეების დამატკბობელი.

¹¹მე ჩემი საყვარლის ვარ და ჩემსკენ მოილტვის ისიც.

¹²მოდი, საყვარელო, ჩემო, გავიდეთ ველად, დაბა-სოფლებში ვათიოთ ღამე.

¹³ავდგებოდით დილით სისხამზე ვენახთა მოსახილვად; ვნახავდით, თუ ყვავის ვაზი, თუ იშლებიან ვაზის კვირტები, თუ ყვავის ბროწეული; ჩემს ალერსს იქ მოგცემდი.

¹⁴სურნელებას დააფრქვევდნენ მანდრაგორები; ყოველგვარი ხილია ჩვენი კარის წინ — ახალი და ძველი. შენთვის მაქვს შენახული, საყვარელო ჩემო.“