Read ბიბლია სიბრძნე სოლომონისა 1 Bible Online

სიბრძნე სოლომონისა 1 - ბიბლია bible

სიბრძნე სოლომონისა 1

¹შეიყვარეთ სამართლიანობა, ქვეყნის მსაჯულ-ნო, შეიცანით უფალი სიკეთით და გულის სიწრფელით ეძიეთ იგი.

²რადგანაც იპოვება იმათგან, ვინც არ გამოსცდის მას, და გამოეცხადება იმათ, ვისაც სწამს მისი.

³რადგანაც მრუდე ზრახვანი გვაშორებენ ღმერთს, და მისი ძალის გამოცდა ამხელს უგუნურთ.

⁴რადგან სიბრძნე ვერ შეაღწევს უკეთურ სულში და ვერც ცოდვას დამონებულ სხეულში დაივანებს.

⁵რადგან წმიდა სული წვრთნისა გაურბის მზაკვრობას, განუდგება უკეთურ ზრახვას და ზიზღით უარყოფს მოახლოებულ უსამართლობას.

⁶კაცთმოყვარე სულია სიბრძნე და დაუსჯელს არ დატოვებს იმას, ვისი ბაგენიც გმობას იტყვიან, ვინაიდან ღმერთია მისი იდუმალი ზრახვების მოწმე, სიმართლით რომ იკვლევს მის გულს, და მისი ენის მსმენელი.

⁷უფლის სული ავსებს სამყაროს, და როგორც ყოვლისმომცველმა, იცის ყოველი ჩქამი.

⁸ამიტომ უსამართლობის მთქმელთაგან ვერავინ დაიმალება, და არ ასცდება მას მამხილებელი მსჯავრი.

⁹რადგან უღვთოს ზრახვანი გამოძიებულ იქნება და მისი სიტყვები უფლის ყურამდე სამხილებლად მიაღწევს.

¹⁰შურისმგებლის ყური ყველაფერს ისმენს, და თვით ჩუმი დრტვინვაც არ გამოეპარება.

¹¹ამიტომაც ერიდეთ ამაო დრტვინვას და ეკრძალეთ ავსიტყვაობას, რადგან თვით ფარულად თქმულიც კი ფუჭად არ ჩაივლის, და ცილისმწამებელ ბაგეს შეუძლია ჩაკლას სული.

¹²ნუ ეშურებით სიკვდილს თქვენი სიცოცხლის ცთომილებით, და ნუ მოიახლოვებთ აღსასრულს თქვენი ხელის ნამოქმედარით.

¹³რადგან სიკვდილი ღმერთს არ შეუქმნია და არც ცოცხალთა დაღუპვით ხარობს.

¹⁴რადგან ყველაფერი არსებობისთვის შექმნა და სამყაროს მხსნელნი არიან თაობები; არ არის მათში სასიკვდილო შხამი და არც ჯოჯოხეთის სუფევა მიწაზე.

¹⁵რადგან სამართლიანობა უკვდავია.

¹⁶მაგრამ უღვთოებმა ხელითაც და ხმითაც უხმეს ჯოჯოხეთს და მასთან დამოყვრებულნი, ჩაჭკნენ; და აღთქმა დაუდეს მას, რადგან ღირსნი არიან მის კერძად იქცნენ.