Read ბიბლია სიბრძნე სოლომონისა 11 Bible Online

სიბრძნე სოლომონისა 11 - ბიბლია bible

სიბრძნე სოლომონისა 11

¹კეთილად წარმართა სიბრძნემ მათი საქმენი წმიდა წიმასწარმეტყველის ხელით.

²გადალახეს უდაბნოები და უვალ ადგილებში დასცეს კარვები.

³წინ აღუდგნენ მომხვდურთ და უკუაქციეს მტრები.

⁴მოსწყურდათ და შემოგღაღადეს, და შენც სალი კლდიდან მიეც მათ წყალი და პიტალო ქვიდან დაარწყულე ისინი.

⁵რადგანაც გასაჭირში მყოფთ ის მიემადლათ, რითაც დასჯილ იქნენ მათი მტრები:

⁶მარადმედინი მდინარის ნაცვლად, სისხლით რომ იქნა შეღებილი

⁷მათ დასასჯელად, ვინც ბრძანა გაეჟლიტათ ყრმები, მოულოდნელად უწყალობე, უფალო, უხვი წყალი,

⁸და ამრიგად უჩვენე მწყურვალთ, თუ როგორ დასაჯე მათი წინააღმდგომნი;

⁹მაშინ წყურვილით უჩვენე, როგორ დასაჯე მათი წინააღმდგომნი.

¹⁰რადგანაც შენიანებს შენ სცდიდი, როგორც მამა, შესაგონებლად. მათი მტრები კი დასაჯე, როგორც მრისხანე მეფემ.

¹¹იქ მყოფნიცა და არმყოფნიც ერთნაირად იტანჯებოდნენ,

¹²რადგანაც ორმაგ მწუხარებას მოეცვა ისინი, და გოდებდნენ იმის გახსენებაზე, რაც თავს გადახდათ.

¹³როცა გაიგეს მათ, რომ მათი დასჯით შეწყალებულ იქნენ მართალნი, შეიცნეს უფალი,

¹⁴ვინც უწინ, როგორც განკიცხული, დაგმეს და უარყვეს, და ვისაც შემდგომ მოვლენათა გამო გაოგნებულნი უმზერდნენ, რადგანაც მათი წყურვილი არ ჰგავდა მართალთა წყურვილს.

¹⁵ხოლო იმის გამო, რომ მათი უსამართლობითა და მათივე უგუნური ზრახვებით ცთუნებულნი ემსახურებოდნენ უტყვ ქვეწარმავლებსა და უკეთურ ურჩხულებს, უგონო პირუტყვთა სიმრავლე მოუვლინე მათ სასჯელად,

¹⁶რათა შეეგნოთ, რომ ვინც რითი სცოდავს, იმითვე იქნება დასჯილი.

¹⁷განა შეუძლებელი იქნებოდა შენი ყოვლისმძლე ხელისათვის, რომელმაც უსახო მასალისაგან შექმნა სამყარო, დათვთა თუ მძვინვარე ლომთა სიმრავლე მიესია მათთვის;

¹⁸ან ახლადშექმნილ რისხვით სავსე უცნობთა მხეცთა, ან ცეცხლოვანი ფშვენით მფშვინვარეთ, ან ცეცხლსა და სიმყრალის კვამლს რომ აფრქვევენ ნესტოებიდან, თვალებიდან კი ნაპერწკლებს ყრიან,

¹⁹რომელთაც არა მარტო თავიანთი სიშმაგით შეეძლოთ მუსრი გაევლოთ მათთვის, არამედ, თავიანთი თავზარდამცემი იერით, ერთი შეხედვითაც აღეგავათ მიწის პირისაგან.

²⁰თუმცა მათ გარეშეც, ერთი შებერვით შეიძლებოდა დაგემხო მართლმსაჯულებით დევნილნი და შენი მძლეთამძლე სულით მიმოფანტულნი, მაგრამ შენ ყოველივე ზომით, რიცხვითა და წონით განაწესე.

²¹რადგანაც შენი დიადი ძალა ყოველთვის შენს ხელთაა და ვინ დაუდგება წინ შენს ძლევამოსილ მარჯვენას?

²²შენს წინაშე მთელი სამყარო სხვა არა არის რა, თუ არა სასწორის პინათა რხევა, ან ცვარ-ნამი, ზეციდან რომ ეფრქვევა მიწას.

²³ყველა გეწყალვის, რადგანაც ყოვლისშემძლე ხარ, და თვალს არიდებ კაცთა ცოდვებს, იმისთვის, რომ მოინანიონ.

²⁴ყოველი არსი გიყვარს და არც რა გძულს, რაც შეგიქმნია; რომ გძულებოდა, ხომ არც შექმნიდი!

²⁵ან კი რა იარსებებდა, შენ რომ არ გენებებინა? ანდა რა გააძლებინებდა, შენ რომ არ გეხმო?

²⁶ყველაფერს ინდობ, რადგანაც ყველაფერი შენია, სულისმოყვარე მეუფეო.