Read ბიბლია სიბრძნე სოლომონისა 12 Bible Online

სიბრძნე სოლომონისა 12 - ბიბლია bible

სიბრძნე სოლომონისა 12

¹რადგანაც ყველაფერშია შენი უხრწნელი სული.

²ამიტომ თანდათანობით ამხელ შეცთომილთ და შეახსენებ, რაში სცოდავენ; შეაგონებ, ზურგი აქციონ ბოროტებას და სწამდეთ შენი, უფალო.

³ძველი მკვიდრნი შენი წმი და მიწისა

⁴შეიძულე უგვანი ქცევის, ჯადოქრობისა და უწმინდური მსხვერპლშეწირვისთვის;

⁵შეიძულე ყრმათა უწყალო მჟლეტნი, ადამიანის შიგნეულს რომ ჭამდნენ და ხვრეპდნენ სისხლს სამსხვერპლო ღრეობებზე საიდუმლოდ თავშეყრილნი

⁶ისევე, როგორც უმწეო სულთა მკვლელი მშობლები. და ინებე ჩვენი მამა-პაპის ხელით ამოგეწყვიტა ისინი,

⁷რათა შენთვის ყველაზე ძვირფასი მიწა ღვთის შვილთა ღირსეულ სამკვიდროდ ქცეულიყო.

⁸მაგრამ ისინიც კი დაინდე, როგორც ადამიანები, რაკიღა შენს მხედრობაზე უმალ კრაზანები მიუსიე, რათა თანდათან გაევლოთ მუსრი მათთვის.

⁹თუმცა შეგეძლო უსჯულონი ბრძოლით დაგემონებინა მართალთათვის, ან საზარელი მხეცებითა თუ მრისხანე სიტყვით ერთბაშად მოგესრა ისინი.

¹⁰მაგრამ თანდათან რომ სჯიდი მათ, დროს აძლევდი სინანულისთვის, თუმცა იცოდი, რომ მათი მოდგმა უკეთურია, ბოროტება კი — თანდაყოლილი, და მათი ზრახვა უცვლელი დარჩებოდა უკუნისამდე.

¹¹რადგანაც მათი თესლი დაწყევლილია დასაბამიდან, და შენ ვისიმე შიშის გამო როდი ტოვებდი დაუსჯელად მათ ცოდვებს.

¹²რადგანაც ვინ გეტყვის: რა ჩაიდინე, ან შენს მსჯავრს ვინ აღუდგება წინ? ვინ დაგდებს ბრალს შენს მიერვე შექმნილ ხალხთა დაღუპვისათვის? ან შენს წინაშე ვინ გამოექომაგება ცოდვილთ?

¹³რადგან არ არის ღმერთი შენს გარდა, ყველაზე რომ ზრუნავდეს, ვისთვისაც უნდა გემტკიცებინა, რომ უსამართლოდ არავის სჯი.

¹⁴ვერცერთი მეფე, ვერც მბრძანებელი ვერას გკადრებს იმათ გამო, ვინც შენ დასაჯე.

¹⁵თავად მართალი მართლად განაგებ ყოველს, რადგანაც შენი ძალმოსილებისთვის უკადრისად მიგაჩნია იმისი დასჯა, ვინც არ იმსახურებს სასჯელს.

¹⁶ვინაიდან შენი ძალა სამართლიანობის დასაბამია, და ის, რომ ყველაზე მბრძანებლობ, ყოვლისდანმდობად გაქცევს.

¹⁷შენს ძალას უჩვენებ იმას, ვისაც არა სწამს შენი ყოვლისმძლეობა, ხოლო შენს არმცნობს კადნიერებაში ამხელ.

¹⁸მაგრამ შენ, ძალის მფლობელი, ლმობიერად განგვსჯი და დიდსულოვნად გვმართავ, რადგან, როცა ინებებ, მაშინ გამოავლენ შენს ძალას.

¹⁹აი, ასე დამოძღვრე შენი ხალხი, რომ მართალი კაცთმოყვარე უნდა იყოს, და იმედი ჩაუნერგე მას, რომ სინანულს უწესებ ცოდვების გამოსასყიდად.

²⁰რადგან თუ შენი შვილების მტრებს და სიკვდილით დასასჯელთ ასე ლმობიერად და სულგრძელად სჯიდი, რაკიღა საიმისოდ დროსა და შემთხვევას აძლევდი მათ, რომ ბოროტებას განდგომოდნენ,

²¹რაოდენ უფრო ფრთხილად განსჯი შენს შვილებს, რომელთა მამა-პაპასაც ფიცი მიეცი და სასიკეთო აღთქმა დაუდე.

²²ჩვენ რომ შეგვაგონებ, ათასწილ უფრო მკაცრად სჯი ჩვენს მტრებს, რათა დამსჯელნი შენს სიკეთეზე ვფიქრობდეთ, ხოლო, როცა თვითონ ვისჯებით, შენი მოწყალების იმედი გვქონდეს.

²³ამიტომაც მათივე სიბილწით აწამე უსამართლონი, უგუნური ცხოვრებით რომ ცხოვრობდნენ.

²⁴რადგანაც მცდარი გზით მოარულთ შორს შეტოპეს და უჭკუო ბალღებივით მოტყუებულნი ღმერთებად მიიჩნევდნენ იმ ცხოველებს, რომლებიც თვით მტრებსაც კი სძაგდათ.

²⁵ამიტომ, როგორც უგუნურ ყრმებს, გმობა მოუვლინე სასჯელად.

²⁶მაგრამ რაკი მამხილებელი გმობითაც გონს ვერ მოეგნენ, რისი ღირსნიც იყვნენ, ღმერთმა ის სასჯელი დაატეხა თავს.

²⁷იმავე ცხოველებისაგან სასომიხდილნი და ტანჯულ-წამებულნი, რომლებიც ღმერთებად მიაჩნდათ, იძულებულნი შეიქნენ ეღიარებინათ ჭეშმარიტი ღმერთი, რომელსაც უწინ არ სცნობდნენ. ამიტომაც მოაწია მათზე უზენაესმა მსჯავრმა.