Read ბიბლია სიბრძნე სოლომონისა 13 Bible Online

სიბრძნე სოლომონისა 13 - ბიბლია bible

სიბრძნე სოლომონისა 13

¹უბადრუკია ბუნებით ყველა ადამიანი, ვინც ვერ შეიცნო ღმერთი; ხილულ სიკეთეთა მიხედვით მათ ვერ შეძლეს ზეარსის წვდომა და ნახელავის მიხედვით ვერ გამოიცნეს ხელოვანი;

²არამედ ცეცხლსა თუ ქარსა, მოლივლივე ჰაერსა, თუ წრიულად მბრუნავ ვარსკვლავებსა და წყალსა, თუ ციურ მნათობებს რაცხდნენ სამყაროს გამრიგე ღმერთებად.

³თუკი მათი სილამაზით მონუსხულთ ღმერთები ეგონათ ისინი, მაშინ იმასაც უნდა მიმხვდარიყვნენ, რაოდენ უმჯობესია მათზე უფალი, რადგან სწორედ მან, მშვენიერების დასაბამმა, შექმნა ისინი.

⁴ხოლო თუ მათი ძალა და ქმედითობა განაცვიფრებდათ, მათი მიხედვით ისიც უნდა შეეცნოთ, რაოდენ უფრო ძალმოსილი იქნებოდა მათზე მათივე შემოქმედი:

⁵რადგანაც ქმნილებათა მშვენიერების სიდიადის მიხედვით შეიცნობა მათი შემოქმედიც.

⁶თუმცა ისინი ნაკლებ საგმობნი არიან, რადგან, თუ ცდებიან მისი მიკვლევის მსურველნი, ღვთის ძიებისას ცდებიან.

⁷ღვთის ქმნილებებისაკენ მიქცეულნი ეძიებენ და მზერა არწმუნებს მათ, რომ ყოველივე ხილული მშვენიერია.

⁸და მაინც, ისინიც კი არ არიან შენდობის ღირსნი.

⁹თუკი იმისი თავი ჰქონდათ, რომ შეეცნოთ საგანთა მარადიული წესრიგი, უმალ რატომ ვერ შეიცნეს მათი გამრიგე?

¹⁰მაგრამ უფრო საწყალობელნი არიან ისინი, უსულო საგნებზე რომ ამყარებენ თავიანთ იმედს და ღმერთებად მიიჩნევენ ადამიანთა ხელით ნაქმარს — ოქრო-ვერცხლის ნატიფ ნაკეთობებს, ცხოველთა გამოსახულებებს ან სრულიად უსარგებლო ქვას — ძველ ოსტატთა ნახელავს.

¹¹მოჭრის ვინმე შეშისმჭრელი ადვილად საზიდ ხეს, მარჯვედ გალოპრავს, კოხტად გამოთლის და ოჯახში სახმარ ჭურჭელს დაამზადებს.

¹²რაც მორჩება, ცეცხლს შეუკეთებს, კერძს მოხარშავს და ფერდს ამოივსებს.

¹³მერე აიღებს ერთ ჩამონაჭერს, არად სახმარს, მრუდეს, ნუჟრიანს, გულმოდგინედ გარანდავს, მოცლილობის ჟამს ხელმარჯვედ დაამუშავებს და კაცის სახედ გამოხატავს;

¹⁴ან რომელიმე უსახურ ცხოველს მიამგვანებს, სურინჯს წაუსვამს, მეწამულ ფერს მისცემს და ყველა მის ხინჯს დაფარავს,

¹⁵სათანადო ადგილს მიუჩენს, კედელზე ჩამოკიდებს და რკინით მიამაგრებს.

¹⁶ამრიგად, წინასწარვე ზრუნავს იმაზე, რომ ძირს არ ჩამოვარდეს, რადგანაც იცის, რომ ეს მხოლოდ კერპია, თავის თავს ვერ უშველის და შემწეობა სჭირდება.

¹⁷ხოლო როცა მის წინაშე სიმდიდრის, ქორწინებისა და შვილებისათვის ლოცულობს, უსულოსთან საუბარი არ ერცხვინება; ჯანმრთელობა მიბოძეო, ემუდარება უძლურს,

¹⁸მკვდარს სთხოვს სიცოცხლეს, შემწეობას ევედრება უმწეოს და მგზავრობაში მფარველობას — იმას, ვისაც ნაბიჯის გადადგმაც არ შეუძლია;

¹⁹საშოვარს, სამუშაოსა და ხელის მომართვას — იმას, ვისაც ხელის განძრევის თავიც არა აქვს.